റായ്പുര്: ഛത്തീസ്ഗഡ് മുഖ്യമന്ത്രിയുടെ ഹെലികോപ്ടറില് സുഹൃത്തിന് പ്രീ വെഡ്ഡിങ്ങ് ഫോട്ടോഷൂട്ടിന് അനുമതി നല്കിയ പൈലറ്റിന് സസ്പെന്ഷന്. വരന്റെയും വധുവിന്റെയും ഹെലികോപ്ടറില്നിന്നുള്ള ചിത്രങ്ങള് സമൂഹമാധ്യമങ്ങളില് വൈറലായതോടെയാണ് നടപടി.
വരന്റെ സുഹൃത്താണ് ഹെലികോപ്ടര് പൈലറ്റ് യോഗേശ്വര് സായ്. ജനുവരി 20നായിരുന്നു സായ്യുടെ സമ്മതപ്രകാരം വധൂവരന്മാന് സംസ്ഥാന സര്ക്കാരിന്റെ ഹെലികോപ്ടറായ ‘എ.ഡബ്ല്യൂ 109 പവര് എലൈറ്റില്’ ഫോട്ടോഷൂട്ട് നടത്തിയത്.
സായ് സുരക്ഷ മാനദണ്ഡങ്ങള് ലംഘിച്ചുവെന്നും ആളുകളെ ഔദ്യോഗിക വാഹനത്തില് പ്രവേശിപ്പിച്ചുവെന്നും സിവില് ഏവിയേഷന് വകുപ്പ് ചൂണ്ടിക്കാട്ടി. അനുമതിയുണ്ടെന്ന് സുരക്ഷ ഗാര്ഡുകളോട് വ്യക്തമാക്കിയ ശേഷമാണ് ഇരുവരെയും പൈലറ്റ് ഹെലികോപ്ടറിന് സമീപം കൂട്ടിക്കൊണ്ടുപോയത്. ഛത്തീസ്ഗഡ് സിവില് ഏവിയേഷന് വകുപ്പില്നിന്ന് സായ്യെ നവ റായ്പുരിലെ ഡയറക്ടറേറ്റ് ഓഫ് ഏവിയേഷനിലേക്ക് മാറ്റുകയും ചെയ്തു. സംഭവത്തില് അന്വേഷണവും പ്രഖ്യാപിച്ചു.
സമൂഹമാധ്യമങ്ങളില് ചിത്രങ്ങള് വൈറലായതോടെ പ്രതികരണവുമായി മുഖ്യമന്ത്രി ഭൂപേഷ് ബാഗല് രംഗത്തെത്തി. സംസ്ഥാന സര്ക്കാരിന്റെ ഹെലികോപ്ടറില് പ്രീ വെഡ്ഡിങ് േഫാട്ടോഷൂട്ട് നടത്തിയത് ശ്രദ്ധയില്പ്പെട്ടതായും ഇത്തരത്തില് വീഴ്ച സംഭവിച്ചത് അന്വേഷിച്ച് റിപ്പോര്ട്ട് സമര്പ്പിക്കാന് നിര്ദേശം നല്കിയതായും അദ്ദേഹം ട്വിറ്ററിലൂടെ അറിയിച്ചു.
