നെടുമ്പാശ്ശേരി : കൊച്ചി വിമാനത്താവളത്തിൽ രണ്ട് യാത്രക്കാരിൽനിന്നായി 2.816 കിലോ സ്വർണം പിടികൂടി. സൗദി എയർലൈൻസ് വിമാനത്തിൽ റിയാദിൽ നിന്നെത്തിയ കോഴിക്കോട് മടവൂർ മുട്ടഞ്ചേരി സ്വദേശി ഫഹദ്, ജിദ്ദയിൽ നിന്നെത്തിയ അമ്പലവയൽ സ്വദേശി അഖിൽ എന്നിവരിൽ നിന്നാണ് സ്വർണം പിടിച്ചത്.
ഫഹദിന്റെ പക്കൽ നിന്ന് 2.100 കിലോയും അഖിലിന്റെ പക്കൽനിന്ന് 716 ഗ്രാമുമാണ് കസ്റ്റംസ് എയർ ഇന്റലിജൻസ് വിഭാഗം പിടികൂടിയത്. ഫഹദ് സ്പീക്കറിനുള്ളിൽ ഒളിപ്പിച്ചാണ് സ്വർണം കൊണ്ടുവന്നത്. അഖിൽ സ്വർണ മിശ്രിതം കാപ്സ്യൂൾ രൂപത്തിലാക്കി മലദ്വാരത്തിൽ ഒളിപ്പിച്ചിരിക്കുകയായിരുന്നു. പിടികൂടിയ സ്വർണത്തിന് മൊത്തം ഒന്നര കോടിയോളം രൂപ വില വരും.
