ബെംഗളൂരു: കര്ണാടക മുഖ്യമന്ത്രി തെരഞ്ഞെടുപ്പുമായി ബന്ധപ്പെട്ട് പരസ്യ പ്രതികരണം വിലക്കി ഹൈക്കമാന്ഡ്. പരസ്യ പ്രതികരണം നടത്തിയാല് അച്ചടക്ക നടപടി സ്വീകരിക്കുമെന്ന് കര്ണാടകയുടെ ചുമതലയുള്ള എ.ഐ.എസി.സി ജനറല് സെക്രട്ടറി രണ്ദീപ് സുര്ജേവാല നിര്ദേശം നല്കി. കര്ണാടകയില് മുഖ്യമന്ത്രി പദത്തെ ചൊല്ലിയുള്ള തര്ക്കങ്ങള് തുടരുന്നതിനിടെ പല തരത്തിലുള്ള വാര്ത്തകള് പ്രചരിക്കുന്നുണ്ട്. ഇതിനിടെയാണ് പരസ്യ പ്രതികരണം വിലക്കിയത്.
തെരഞ്ഞെടുപ്പ് ഫല പ്രഖ്യാപനം വന്ന് നാല് ദിവസം പിന്നിടുമ്പോഴും മുഖ്യമന്ത്രി പദത്തെ ചൊല്ലിയുള്ള തര്ക്കം തുടരുകയാണ്. ഡി.കെ ശിവകുമാറിനെ അനുനയിപ്പിക്കാനാകാതെ കുഴയുകയാണ് ഹൈക്കമാന്ഡ്. ഡി.കെ ശിവകുമാറുമായി പാര്ട്ടി ദേശീയ അധ്യക്ഷന് മല്ലികാര്ജുന് ഖാര്ഗെ കൂടിക്കാഴ്ച നടത്തിയെങ്കിലും ഫലമുണ്ടായില്ല. ആദ്യത്തെ രണ്ടര വര്ഷത്തെ കാലാവധി തനിക്കും രണ്ടാമത്തേത് സിദ്ധരാമയ്യയ്ക്കും നല്കണമെന്ന് ഡികെ ശിവകുമാര് ആവശ്യപ്പെടുന്നു. തനിക്ക് ആദ്യ ടേം നല്കണമെന്നും അല്ലെങ്കില് ഒന്നും വേണ്ടെന്നും ഡികെ ശിവകുമാര് തുറന്നടിച്ചുവെന്നാണ് സൂചന.
