കൊച്ചി: അമ്പതുപൈസയുടെയും ഒരു രൂപയുടെയുമൊക്കെ മൂല്യം കുറഞ്ഞിട്ട് വര്ഷങ്ങളായെന്നും മാറിയ സാഹചര്യം വിദ്യാര്ത്ഥികളും വിദ്യാര്ത്ഥി സംഘടനകളും മനസിലാക്കണമെന്നും ഹൈക്കോടതി. ബസ് കണ്സഷനുമായി ബന്ധപ്പെട്ടാണ് കോടതിയുടെ നിരീക്ഷണം. വിദ്യാര്ത്ഥികളെ ബസില് കയറ്റാത്തതിനാല് മോട്ടോര് വെഹിക്കിള് ആക്ട് പ്രകാരമുള്ള കുറ്റങ്ങള് ചുമത്തി മൂന്നു സ്വകാര്യബസ് കണ്ടക്ടര്മാര്ക്കെതിരെ രജിസ്റ്റര് ചെയ്ത കേസുകളും കുറ്റപത്രങ്ങളും റദ്ദാക്കിയാണ് ജസ്റ്റിസ് പി വി കുഞ്ഞികൃഷ്ണന്റെ നിര്ദ്ദേശം.
കണ്സഷന് ചാര്ജ് വര്ധിപ്പിക്കല് സര്ക്കാരിന്റെ നയതീരുമാനമായതിനാല് കോടതിക്ക് നിര്ദ്ദേശം നല്കാനാവില്ല. പക്ഷേ സര്ക്കാരും വിദ്യാര്ത്ഥി സംഘടനകളും മാറിയ സാഹചര്യങ്ങള് വിലയിരുത്തണം. ബസ് ഉടമകള്ക്ക് കണ്സഷന് വര്ദ്ധനയ്ക്കായി സര്ക്കാരിനെയും ഗതാഗതവകുപ്പിനെയും സമീപിക്കാം. എന്നാല് കണ്സഷന് നിലവിലുള്ള സാഹചര്യത്തില് വിദ്യാര്ത്ഥികളോടു വിവേചനപരമായി പെരുമാറാന് ബസുടമകള്ക്കും ജീവനക്കാര്ക്കും കഴിയില്ല. വിദ്യാര്ത്ഥികള്ക്കും മറ്റു യാത്രക്കാര്ക്കും ഒരേ പദവിയാണുള്ളതെന്നും കോടതി വ്യക്തമാക്കി.
