കൊച്ചി: ഔദ്യോഗിക ആവശ്യങ്ങള്ക്കല്ലാതെ ആരും പൊന്നമ്പലമേട്ടിലേക്ക് പ്രവേശിക്കരുതെന്ന് ഹൈക്കോടതി. പൊന്നമ്പലമേട്ടിലേക്കുള്ള പ്രവേശനം നിയന്ത്രിച്ചിരിക്കുകയാണ് കോടതി. പൊന്നമ്പല മേട്ടില് അനധികൃത പൂജ നടത്തിയതുമായി ബന്ധപ്പെട്ട് സ്വമേധയാ എടുത്ത കേസിലാണ് നിര്ദേശം. പൂജ നടത്തിയ സംഭവത്തില് വിശദമായ അന്വേഷണം നടത്താന് പോലീസിനോട് ദേവസ്വം ബെഞ്ച് ആവശ്യപ്പെട്ടു.
പൊന്നമ്പലമേട്ടില് കടന്നുകയറി അനധികൃതമായി പൂജ നടത്തിയ സംഭവത്തില് തമിഴ്നാട് സ്വദേശി നാരായണന് അടക്കം ഒന്പത് പേര്ക്കെതിരെ മൂഴിയാര് പോലീസ് കേസെടുത്തിട്ടുണ്ട്. സംഘത്തിന് സഹായം ചെയ്ത വനം വികസന കോര്പ്പറേഷന് ജീവനക്കാരായ രാജേന്ദ്രന്, സാബു എന്നിവരെ ആദ്യം അറസ്റ്റ് ചെയ്തത്. ഇടനിലക്കാരന് ചന്ദ്രശേഖരന് കഴിഞ്ഞ ദിവസവും അറസ്റ്റിലായിരുന്നു.