തിരുവനന്തപുരം : സംസ്ഥാനത്തെ പ്രൊഫഷണല് കോളേജുകള് ഉള്പ്പെടെയുള്ള എല്ലാ ഉന്നതവിദ്യാഭ്യാസ സ്ഥാപനങ്ങളും നാളെ തുറക്കും. കൊവിഡ് മാനദണ്ഡങ്ങള് പാലിച്ച് അവസാന വര്ഷ ബിരുദ, ബിരുദാനന്തര ബിരുദ ക്ലാസുകളാണ് നാളെ തുടങ്ങുക. വിദ്യാര്ത്ഥികള്ക്കും അധ്യാപകര്ക്കും പ്രത്യേക വാക്സിന് ഡ്രൈവ് നടത്തുകയും കോളേജുകള് അണുനശീകരണം പൂര്ത്തിയാക്കുകയും ചെയ്ത സാഹചര്യത്തിലാണ് കൊവിഡ് പശ്ചാത്തലത്തില് അടച്ചിട്ടിരിക്കുന്ന സംസ്ഥാനത്തെ പ്രൊഫഷണല് കോളേജുകള് ഉള്പ്പെടെയുള്ള എല്ലാ ഉന്നതവിദ്യാഭ്യാസ സ്ഥാപനങ്ങളും നാളെ തുറക്കുന്നത്.
അഞ്ചും ആറും സെമസ്റ്റര് ബിരുദ ക്ലാസുകളും മൂന്ന്, നാല് സെമസ്റ്റര് പിജി ക്ലാസുകളുമാണ് നാളെ മുതല് ആരംഭിക്കുന്നത്. പിജി ക്ലാസുകള് മുഴുവന് വിദ്യാര്ത്ഥികളെയും ഉള്ക്കൊള്ളിച്ചുകൊണ്ടും ബിരുദ ക്ലാസുകള് 50 ശതമാനം വിദ്യാര്ത്ഥികളെ ഒരു ബാച്ച് ആയി പരിഗണിച്ച് ഇടവിട്ടുള്ള ദിവസങ്ങളിലായി പ്രതേക ബാച്ചുകാളായുമാണ് നടത്തുന്നത്.
ക്ലാസ്സുകളുടെ സമയക്രമം കോളേജുകള്ക്ക് തീരുമാനിക്കാം. സയന്സ് വിഷയങ്ങളില് പ്രാക്റ്റിക്കല് ക്ലാസുകള്ക്കും പ്രാധാന്യം നല്കാം. കര്ശന കൊവിഡ് മാനദണ്ഡങ്ങള് പാലിച്ചാണ് ക്ലാസുകള് പ്രവര്ത്തിക്കേണ്ടെതെന്നും നിബന്ധനകള് പാലിക്കുന്നുണ്ടെന്ന് സ്ഥാപന അധികാരികള് ഉറപ്പാക്കണമെന്നും നിര്ദേശമുണ്ട്.
