തിരുവനന്തപുരം : വഴുതക്കാട് കോട്ടണ്ഹില് സ്കൂളില് മകളെ കൂട്ടാനെത്തിയ പിതാവിനോട് അപമര്യാദയായി പെരുമാറിയെന്ന പരാതിയില് പൂജപ്പുര ഗ്രേഡ് എസ്ഐയ്ക്കും കേസെടുത്ത മ്യൂസിയം പൊലീസിനുമെതിരെ ഉന്നതതല അന്വേഷണം വേണമെന്നു മനുഷ്യാവകാശ കമ്മിഷന് ശുപാര്ശ. ഡി,വൈ.എസ്.പി റാങ്കില് കുറയാത്ത ഉദ്യോഗസ്ഥന് ഈ കേസ് അന്വേഷിക്കണം. പൂന്തുറ സെന്റ് തോമസ് സ്കൂളിലെ അധ്യാപകനായ ജാക്സണോടു കഴിഞ്ഞ ഏപ്രില് 22നു പോലീസ് മോശമായി പെരുമാറിയ സംഭവത്തിലാണു ഈ നടപടി.
കുട്ടികളെ വിളിക്കാനെത്തിയ രക്ഷിതാക്കളെ പൂജപ്പുര ഗ്രേഡ് എസ്ഐയും മറ്റൊരു പോലീസുകാരനും ചേര്ന്ന് അസഭ്യം വിളിച്ചതു ചോദ്യം ചെയ്തതിനു തന്നോടു പ്രതികാരം ചെയ്തെന്നാണു ജാക്സന്റെ പരാതി. സ്കൂളില് സൂക്ഷിച്ച ഇലക്ട്രോണിക് വോട്ടിങ് യന്ത്രത്തിന്റെ സുരക്ഷാ ജോലിക്കു നിയോഗിക്കപ്പെട്ടതായിരുന്നു ഈ പൊലീസുകാര്. മകളെ കൂട്ടാനെത്തിയ ജാക്സണും ഇവരുമായി വാക്കുതര്ക്കമുണ്ടായിരുന്നു. എസ്ഐയുടെ നിര്ദേശപ്രകാരം സ്ഥലത്തെത്തിയ മ്യൂസിയം പോലീസ് പരാതിക്കാരന്റെ വാഹനത്തിന്റെ ആര്സി ബുക്ക് പിടിച്ചെടുക്കുകയും കേസെടുക്കുകയും ചെയ്തു.
