ഷിംല: കഞ്ചാവ് കൃഷി നിയമവിധേയമാക്കുന്നത് പഠിക്കാന് എം.എല്.എമാരെ നിയോഗിച്ച് ഹിമാചല് സര്ക്കാര്. കഞ്ചാവ് കൃഷി നിയമപരമാക്കുന്നത് പഠിക്കാന് എം.എല്.എമാരുടെ അഞ്ചംഗ സമിതിയെ ആണ് നിയോഗിച്ചിരിക്കുന്നത്. സമിതി ഒരുമാസത്തിനകം റിപ്പോര്ട്ട് സമര്പ്പിക്കും. മുഖ്യമന്ത്രി സുഖ് വീന്ദര് സിങ് സുഖുവിന്റെ നിര്ദേശപ്രകാരം സ്പീക്കര് കുല്ദീപ് സിങ് പത്താനിയയാണ് സമിതിയെ നിയോഗിച്ചത്. റവന്യൂ മന്ത്രി ജഗത് സിങ് നേഗി, മുതിര്ന്ന പാര്ലമന്റെറി സെക്രട്ടറി സുന്ദര് സിങ്, എം.എല്.എമാരായ ഹന്സ് രാജ്, പുരന് ചന്ദ് താക്കൂര്, ജനക് രാജ് എന്നിവരാണ് അംഗങ്ങള്.
കഞ്ചാവ് കൃഷിയുടെ ഉപയോഗം, ദുരുപയോഗം, മറ്റ് വശങ്ങള് എന്നിവ സംബന്ധിച്ച് സമിതി ഒരു മാസത്തിനകം റിപ്പോര്ട്ട് സമര്പ്പിക്കും. ബി.ജെ.പി എം.എല്.എ പുരന് ചന്ദ് താക്കൂര് സമര്പ്പിച്ച പ്രമേയം ചര്ച്ചചെയ്തതിലൂടെയാണ് സമിതിയെ നിയമിക്കാന് തീരുമാനിച്ചത്. കഞ്ചാവിന്റെ ഇല, വിത്ത് എന്നിവയുടെ ഔഷധ ഉപയോഗം, ഗുണം എന്നിവ സംബന്ധിച്ച മുഴുവന് വിവരങ്ങളും ലഭിച്ച ശേഷം സര്ക്കാര് ഉചിതമായ തീരുമാനമെടുക്കുമെന്ന് മുഖ്യമന്ത്രി പ്രമേയ ചര്ച്ചയില് പറഞ്ഞിരുന്നു.
