കൊച്ചി : പോപ്പുലര്‍ റോയിക്ക് തിരിച്ചടി, ജാമ്യം നല്‍കാന്‍ പാടില്ലെന്ന ശക്തമായ വാദമുഖങ്ങളുമായി നിക്ഷേപകരുടെ സംഘടനയായ പി.ജി.ഐ.എ. പോപ്പുലര്‍ ഫിനാന്‍സ് നിക്ഷേപ തട്ടിപ്പിലെ പ്രധാന പ്രതി തോമസ്‌ ദാനിയേലിന് നല്‍കിയ ഇടക്കാല ജാമ്യം റദ്ദാക്കണമെന്നും ഇദ്ദേഹം നല്‍കിയ ജാമ്യഹര്‍ജി തള്ളണമെന്നും നിക്ഷേപകര്‍ക്ക് വേണ്ടി ഹാജരായ ന്യുട്ടന്‍സ് ലോ അഭിഭാഷകരായ മനോജ്‌ വി.ജോര്‍ജ്ജ്, രാജേഷ് കുമാര്‍ ടി.കെ എന്നിവര്‍ വാദിച്ചു. തുടര്‍ച്ചയായ മൂന്നാം ദിവസമാണ് ജാമ്യഹര്‍ജിയില്‍ വാദം നടക്കുന്നത്. വാദം നാളെയും തുടരും.
പോപ്പുലര്‍ കേസിന്റെ തുടക്കം കോന്നി സ്വദേശി ആനിയമ്മ കോശിയിലൂടെയായിരുന്നു. കോന്നി പോലീസ് രജിസ്റ്റര്‍ ചെയ്ത ക്രൈം നമ്പര്‍ 1740/2020 കേസാണ് ഇത്. അതുകൊണ്ടുതന്നെ പ്രതി റോയി ഹൈക്കോടതിയില്‍ സമര്‍പ്പിച്ച ജാമ്യഹര്‍ജിയില്‍ പോപ്പുലര്‍ ഗ്രൂപ്പ് ഇന്‍വെസ്റ്റേഴ്സ് അസോസിയേഷന്‍ അംഗമായ ആനിയമ്മ കോശി കക്ഷി ചേരുകയായിരുന്നു. കോടതിയില്‍ എന്‍ഫോഴ്സ് മെന്റ് ഡയറക്ടറേറ്റ് അഭിഭാഷകര്‍ക്കൊപ്പം ന്യൂട്ടന്‍സ് ലോ അഭിഭാഷകരും തോമസ്‌ ദാനിയേലിന്റെ (റോയി) ജാമ്യത്തെ ശക്തമായി എതിര്‍ക്കുകയാണ്. ഇതോടെ റോയിക്ക് ജാമ്യം ലഭിക്കുവാനുള്ള സാധ്യത മങ്ങി.
പ്രതികളുടെ ഓസ്ട്രേലിയന്‍ ബന്ധത്തിന്റെ വ്യക്തമായ ചില സൂചനകള്‍ ഇ.ഡി കോടതിയില്‍ സമര്‍പ്പിച്ചിട്ടുണ്ട്. ഇത് പ്രതികള്‍ക്ക് തിരിച്ചടിയാകും. ഇഡിയുടെ അന്വേഷണം പുരോഗമിച്ചുകൊണ്ടിരിക്കുകയാണ്. കൂടാതെ സി.ബി.ഐയും എസ്.എഫ്.ഐ.ഓയും പോപ്പുലര്‍ നിക്ഷേപ തട്ടിപ്പ് അന്വേഷിച്ചുകൊണ്ടിരിക്കുകയാണ്. 1200 കോടി രൂപ നിക്ഷേപകര്‍ക്ക് തിരികെ നല്‍കാനുണ്ടെന്നാണ് കണക്ക്. പോലീസില്‍ പരാതി നല്‍കിയ കണക്കുപ്രകാരമാണ് ഇത്. എന്നാല്‍ ഇതിന്റെ പല മടങ്ങ്‌ തുകയാണ് തട്ടിപ്പ് നടത്തിയതെന്നാണ്‌ വിവരം. കള്ളപ്പണം നിക്ഷേപിച്ചവര്‍ ആരും പരാതിയുമായി മുമ്പോട്ടു വന്നിട്ടില്ല. ഇത് പ്രതികള്‍ക്ക് ഗുണം ചെയ്തു.
