സംഭാല്‍ : ഉത്തര്‍പ്രദേശിലെ സംഭലില്‍ ഹിന്ദു ദൈവങ്ങളുടെ ചിത്രമുള്ള കടലാസ് ഉപയോഗിച്ച്‌ കോഴി ഇറച്ചി വിഭവം പൊതിഞ്ഞെന്ന പരാതിയില്‍ വ്യാപാരി അറസ്റ്റില്‍. സംഭാല്‍ കോട്വാലിയിലെ ഹോട്ടല്‍ ഉടമയായ താലിബ് ഹുസൈന്‍ ആണ് അറസ്റ്റിലായത്. ഹോട്ടലില്‍നിന്നു നല്‍കിയ ഭക്ഷണം ഹിന്ദുദൈവങ്ങളുടെ ചിത്രമുള്ള പത്രക്കടലാസില്‍ പൊതിഞ്ഞുനല്‍കിയെന്ന പരാതിയിലാണ് അറസ്റ്റ്. ഹിന്ദു മതവികാരം വൃണപ്പെട്ടു എന്നാണ് കേസ്. ഇയാള്‍ക്കെതിരെ പോലീസിനെ ആക്രമിച്ചെന്നാരോപിച്ച്‌ വധശ്രമത്തിനും കേസെടുത്തിട്ടുണ്ട്.
കഴിഞ്ഞ ഞായറാഴ്ചയായിരുന്നു സംഭവം. അറസ്റ്റ് ചെയ്യാനെത്തിയ പോലീസിനെ ആക്രമിച്ചെന്ന കേസും ഇയാള്‍ക്കെതിരെ ചുമത്തിയിട്ടുണ്ട്. ആഹാരം പൊതിയാന്‍ ഉപയോഗിച്ച പത്രക്കടലാസും ആക്രമിക്കാന്‍ ഉപയോഗിച്ച കത്തിയും സ്ഥലത്തുനിന്നും പിടിച്ചെടുത്തതായി പോലീസ് പറഞ്ഞു
