കണ്ണൂർ : തളിപ്പറമ്പ് സലാമത്ത് നഗറിൽ പോലീസ് നടത്തിയ പരിശോധനയിൽ വൻതോതിൽ മാരക ലഹരിമരുന്നായ എംഡിഎംഎ പിടികൂടി. സലാമത്ത് നഗർ സ്വദേശിയായ മുഹമ്മദ് ദിൽഷാദിന്റെ വീട്ടിൽ നിന്നാണ് 88 ഗ്രാമിലധികം എംഡിഎംഎ പോലീസ് കണ്ടെടുത്തത്. റൂറൽ പോലീസ് മേധാവിക്ക് ലഭിച്ച രഹസ്യവിവരത്തിന്റെ അടിസ്ഥാനത്തിൽ തളിപ്പറമ്പ് പോലീസും ഡാൻസാഫ് സംഘവും സംയുക്തമായി നടത്തിയ പരിശോധനയിലാണ് ലഹരിമരുന്ന് ശേഖരം പിടികൂടിയത്. കഴിഞ്ഞ ദിവസം വൈകിട്ടോടെയായിരുന്നു ദിൽഷാദിന്റെ വീട്ടിൽ പരിശോധന നടന്നത്.
വീടിനുള്ളിലെ മുറിയിൽ സിപ്പ്ലോക് കവറുകളിലാക്കി സൂക്ഷിച്ച നിലയിൽ 88 ഗ്രാമിലധികം എംഡിഎംഎ പിടികൂടിയത്. തളിപ്പറമ്പ് മേഖലയിലെ പ്രധാന ലഹരി വിതരണക്കാരിൽ ഒരാളാണ് പിടിയിലായ ദിൽഷാദെന്ന് പോലീസ് പറഞ്ഞു. വിൽപനയ്ക്കായി മൈസൂരുവിൽ നിന്നാണ് താൻ ഈ ലഹരിമരുന്ന് എത്തിച്ചതെന്ന് പ്രതി പോലീസിന് മൊഴി നൽകിയിട്ടുണ്ട്. ഇയാൾ ഇതിനു മുൻപും നിരവധി ലഹരിമരുന്ന് കേസുകളിൽ പ്രതിയാണെന്ന് പോലീസ് അറിയിച്ചു.
