എറണാകുളം : കോതമംഗലത്ത് വടാട്ടുപാറയിൽ ജനവാസ മേഖലയിൽ കൂറ്റൻ രാജവെമ്പാലയെ കണ്ടെത്തി. വടാട്ടുപാറ അമ്മാവൻ സിറ്റിക്ക് സമീപം സ്വകാര്യ വ്യക്തിയുടെ പുരയിടത്തിലെ പ്ലാവിൻ മുകളിലാണ് രാജവെമ്പാലയെ കണ്ടത്. പ്രദേശത്തെ ഒരു കുട്ടിയാണ് മരത്തിന് മുകളിൽ പാമ്പ് ചുറ്റിപ്പിണഞ്ഞിരിക്കുന്നത് ആദ്യം ശ്രദ്ധിച്ചത്. തുടർന്ന് കുട്ടി വിവരം നാട്ടുകാരെയും വനപാലകരെയും അറിയിക്കുകയായിരുന്നു. കുട്ടമ്പുഴയിൽ നിന്നുള്ള ആർ.ആർ.ടി സംഘം സ്ഥലത്തെത്തി ഏറെ പണിപ്പെട്ടാണ് പാമ്പിനെ പിടികൂടിയത്.
പ്ലാവിൻ മുകളിലായതിനാൽ പാമ്പിനെ പിടികൂടുക എന്നത് വനപാലകർക്ക് വലിയ വെല്ലുവിളിയായിരുന്നു. ഏറെ നേരത്തെ പരിശ്രമത്തിനൊടുവിൽ പിടികൂടിയ രാജവെമ്പാലയെ വനപാലകർ പിന്നീട് വനത്തിലേക്ക് കൊണ്ടുപോയി. കഴിഞ്ഞ ദിവസങ്ങളിൽ എറണാകുളം ജില്ലയുടെ കിഴക്കൻ മേഖലകളായ പെരുമ്പാവൂർ, കുഴൂർ, കൂത്താട്ടുകുളം, മംഗലത്ത് താഴെ എന്നിവിടങ്ങളിലും പാമ്പുകളെ പിടികൂടിയിരുന്നു.
