തിരുവനന്തപുരം: പോത്തന്‍കോടുള്ള സ്വകാര്യ ആശുപത്രി ആറ് ദിവസത്തെ കോവിഡ് ചികിത്സക്ക് 1,42,708 രൂപ ഈടാക്കിയതിനെക്കുറിച്ച്‌ അന്വേഷിക്കണമെന്ന് സംസ്ഥാന മനുഷ്യാവകാശ കമ്മീഷന്‍. തിരുവനന്തപുരം കളക്ടര്‍ അന്വേഷണം നടത്തി നാലാഴ്ചക്കകം റിപ്പോര്‍ട്ട് സമര്‍പ്പിക്കണമെന്ന് കമ്മീഷന്‍ അധ്യക്ഷന്‍ ജസ്റ്റിസ് ആന്റണി ഡൊമിനിക് ആവശ്യപ്പെട്ടു. തിരുവനന്തപുരം സ്വദേശി ആനന്ദിന്റെ പരാതിയിലാണ് നടപടി. കേസ് ജൂലൈ 14ന് വീണ്ടും പരിഗണിക്കും.
വട്ടിയൂര്‍ക്കാവിലെ സ്വകാര്യാശുപത്രിയിലായിരുന്നു ചികിത്സ. ശ്വാസംമുട്ടല്‍ കൂടിയപ്പോള്‍ കളക്ടറേറ്റില്‍നിന്നുള്ള നിര്‍ദേശപ്രകാരം പോത്തന്‍കോട്ടെ സ്വകാര്യാശുപത്രിയിലേക്ക് മാറ്റി. 84000 രൂപ കൈയില്‍നിന്ന് അടച്ചു. ബാക്കി തുക ഇന്‍ഷുറന്‍സില്‍നിന്ന് ലഭിച്ചു. പി.പി.ഇ കിറ്റിന് ഈടാക്കിയത് 33,000 രൂപയാണ്. മരുന്നിന് 44,458 രൂപയും ഈടാക്കി. മണ്ണാറക്കോണം സ്വദേശി ബി.എച്ച്‌. ആനന്ദ് സമര്‍പ്പിച്ച പരാതിയിലാണ് നടപടി. ആനന്ദിന്റെ പിതാവ് ഭുവനേന്ദ്രനെയാണ് ചികിത്സിച്ചത്. ഹൈക്കോടതിയുടെയും സര്‍ക്കാരിന്റെയും നിര്‍ദേശങ്ങള്‍ ലംഘിച്ച ആശുപത്രിക്കെതിരെ നടപടി വേണമെന്നാണ് ആവശ്യം.
