പത്തനംതിട്ട : ലഹരി വിരുദ്ധ ജനകീയ ബോധവൽക്കരണ പരിപാടിയുടെ ഭാഗമായി പത്തനംതിട്ടയില് നടന്ന ഓപ്പറേഷൻ തൂഫാൻ ജാഗരണിൽ അണിനിരന്ന് നൂറുകണക്കിന് ജനങ്ങള്. സംസ്ഥാന സർക്കാരിന്റെ ലഹരിമുക്ത പദ്ധതിയായ ഓപ്പറേഷൻ തൂഫാന് പിന്തുണ പ്രഖ്യാപിച്ചുകൊണ്ട് സമൂഹത്തിൽ വർദ്ധിച്ചുവരുന്ന ലഹരി ഉപയോഗത്തിനെതിരെ പൊതുജനങ്ങളിൽ അവബോധം വളർത്തുക എന്ന ലക്ഷ്യത്തോടെ പപ്പായ ടൂറിസം വില്ലേജ് സൊസൈറ്റിയാണ് പരിപാടി സംഘടിപ്പിച്ചത്. പരിപാടിയുടെ ഭാഗമായി നെല്ലാട് മുതൽ പുല്ലാട് ജംഗ്ഷൻ വരെ നടന്ന മാരത്തണ് റേസില് നൂറിലധികം ആളുകളാണ് പങ്കെടുത്തത്. പരിപാടിയുടെ സമാപന സമ്മേളനം രാജ്യസഭ ഉപാധ്യക്ഷൻ പ്രൊഫ. പി.ജെ കുര്യൻ ഉദ്ഘാടനം ചെയ്തു.
പപ്പായ വില്ലേജ് ടൂറിസം സൊസൈറ്റി പ്രസിഡന്റ് മോൻസി കിഴക്കേടത്ത് അധ്യക്ഷത വഹിച്ചു. ആന്റോ ആന്റണി എം.പി., ജില്ലാ പോലീസ് മേധാവി ആർ.ആനന്ദ്, ആരോഗ്യമേഖലയിലെയും വിവിധ രാഷ്ട്രീയ സാമൂഹ്യ സാംസ്കാരിക മേഖലയിലെയും പ്രമുഖർ തുടങ്ങിയവര് പങ്കെടുത്തു. പരിപാടിയുടെ ഭാഗമായി സംഘടിപ്പിച്ച മാരത്തൺ റേസിൽ എസ്.പി.സി കേഡറ്റുകളോടൊപ്പം പൊതുജനങ്ങളും അണിചേർന്നു. ജില്ലാ പോലീസ് മേധാവി ലഹരി വിരുദ്ധ പ്രതിജ്ഞ ചൊല്ലി കൊടുത്തു. മാരത്തൻ റൈസിൽ വിജയികളായവർക്ക് മെഡലുകളും വിതരണം ചെയ്തു.
