കോന്നി : മലയോര മേഖലയായ തണ്ണിത്തോട് ഗ്രാമ പഞ്ചായത്തിൽ അനധികൃത വിദേശ മദ്യ വില്പന വ്യാപകമാകുന്നു. വീടുകൾ കേന്ദ്രീകരിച്ചും വാഹനങ്ങളിലും ആയിട്ടാണ് പലപ്പോഴും വില്പന നടക്കുന്നത്. ചിറ്റാർ ബിവറേജസ് ഔട്ട് ലെറ്റുകളിൽ നിന്നും വാങ്ങി കൊണ്ട് വരുന്ന മദ്യം കൂടുതൽ വിലയിൽ വിറ്റഴിക്കുകയാണ് ചെയ്യുന്നത്. വീടുകൾ കേന്ദ്രീകരിച്ചു നടക്കുന്ന മദ്യ കച്ചവടങ്ങൾ അയൽവാസികൾക്കും ബുദ്ധിമുട്ട് സൃഷ്ടിക്കുന്നതായി പരാതി ഉയരുന്നുണ്ട്. എന്നാൽ എക്സ്സൈസ് ഉദ്യോഗസ്ഥർ അടക്കമുള്ളവർ വിഷയത്തിൽ നടപടി സ്വീകരിക്കുന്നില്ലെന്നും ജനങ്ങൾക്ക് ആക്ഷേപമുണ്ട്.
ഓട്ടോ റിക്ഷകളിലും മറ്റ് വാഹനങ്ങളിലും കച്ചവടം നടത്തുന്ന സംഭവങ്ങളും അനവധിയാണ്. എലിമുള്ളുംപ്ലാക്കൽ, തണ്ണിത്തോട്, തേക്കുതോട്, കരിമാൻതോട് തുടങ്ങി പല സ്ഥലങ്ങളിലും ഇത്തരം സംഭവങ്ങൾ വ്യാപകമാണ്. പലപ്പോഴും പല അബ്കാരി കേസുകളിലും പിടിക്കപ്പെടുന്നവർ പിന്നീട് ജാമ്യത്തിൽ ഇറങ്ങുകയും പിന്നീട് വീണ്ടും അനധികൃത മദ്യ കച്ചവടം തുടരുകയും ചെയ്യുന്നതും പതിവാണ്.