മാന്നാര് : അലിന്ഡ് സ്വിച്ഗിയര് ഫാക്ടറിയുടെ സമീപത്തുകൂടി ഒഴുകുന്ന കുട്ടമ്പേരൂര് ആറിന്റെ തീരത്ത് ബണ്ടുപിടിച്ചിരുന്ന മണല് അനുമതി കൂടാതെ കടത്തിക്കൊണ്ടിരുന്നത് അധികൃതര് പിടികൂടി. മണല് കടത്താന് ഉപയോഗിച്ചിരുന്ന ജെസിബി ഉള്പ്പെടെയുള്ള വാഹനങ്ങള് മാന്നാര് പോലീസ് കസ്റ്റഡിയിലെടുത്തു. മാന്നാര് ഗ്രാമപഞ്ചായത്തിലെ ഒമ്പതാംവാര്ഡില് അലിന്ഡ് സ്വിച്ഗിയര് ഫാക്ടറിയുടെ സമീപത്തെ കുട്ടമ്പേരൂര്ആറ് നവീകരിക്കുന്നതിന്റെ ഭാഗമായി ആഴംകൂട്ടിയപ്പോള് ലഭിച്ച മണല് ഉപയോഗിച്ച് ആറുമീറ്ററോളം ഉയരത്തില് സ്ഥാപിച്ച ബണ്ടു നിരത്തിയാണ് മണല് കടത്തിയത്.
അധികൃതരുടെ അനുമതിയില്ലാതെ സ്വിച്ഗിയര് ഡിവിഷന്റെ നേതൃത്വത്തില് ജെസിബി ഉപയോഗിച്ച് ബണ്ടിടിച്ച് ആറിന്റെതീരം നികത്തുകയും ഫാക്ടറിയുടെ അധീനതയിലുള്ള തണ്ണീര്ത്തടങ്ങള് നികത്തുകയുമായിരുന്നെന്ന് പഞ്ചായത്ത് പ്രസിഡന്റ് ടി.വി രത്നകുമാരി പറഞ്ഞു. മണല് നികത്തിയതുമൂലം ആറിന്റെ രണ്ടര മീറ്ററോളംഭാഗം വീതികുറഞ്ഞതായും ഇറിഗേഷന് ഉദ്യോഗസ്ഥര് പറഞ്ഞു. ഒരാഴ്ചയായി മണല് കടത്ത് നടന്നു കൊണ്ടിരുന്നത് ഇന്നലെയാണ് അധികൃതരുടെ ശ്രദ്ധയില്പ്പെടുന്നത്.
മാന്നാര് ഗ്രാമ പഞ്ചായത്ത് പ്രസിഡന്റ് ടി.വി രത്നകുമാരി, വികസന സ്റ്റാന്റിംഗ് കമ്മിറ്റി ചെയര്പേഴ്സണ് ശാലിനി രഘുനാഥ്, ഗ്രാമപഞ്ചായത്തഗം ശിവപ്രസാദ്, മാന്നാര് വില്ലേജ് ഓഫീസര് സുധീര് മേജര് ഇറിഗേഷന് എഇ ജ്യോതി.സി, ഇറിഗേഷന് ഉദ്യോഗസ്ഥര്, മാന്നാര് പോലീസ് തുടങ്ങിയവര് സ്ഥലത്തെത്തി വേണ്ട നടപടികള് കൈക്കൊണ്ടു. കുട്ടമ്പേരൂര് ആറിന്റെ തുടര്നവീകരണങ്ങള്ക്ക് ഭംഗം വരുന്ന നടപടികളിലാണ് കമ്പനിയുടെ ഭാഗത്ത് നിന്നും ഉണ്ടായിരിക്കുന്നതെന്നും ഇതിനെതിരെ ശക്തമായ നിയമനടപടികള് കൈക്കൊള്ളണമെന്നും കുട്ടമ്പേരൂര് ആറിന്റെ നവീകരണപ്രവര്ത്തനങ്ങള്ക്ക് നേതൃത്വം കൊടുത്തു വന്നിരുന്ന ബുധനൂര് മുന്ഗ്രാമപഞ്ചായത്ത് പ്രസിഡന്റ് കൂടിയായ അഡ്വ.പി.വിശ്വംഭരപണിക്കര് പറഞ്ഞു.
