തിരുവനന്തപുരം : തിരവല്ലം വണ്ടിത്തടത്ത് സ്വകാര്യ ഫിനാന്സ് സ്ഥാപനത്തില് മുക്കുപണ്ടം വെച്ച് 1,20,000 രൂപ തട്ടിയ കേസിലെ പ്രതികളെ പോലീസ് പിടികൂടി. പൂന്തുറ മാണിക്യം വിളാകം സ്വദേശി അബ്ദുല് റഹ്മാന്, രണ്ടാം ഭാര്യ വള്ളക്കടവ് സ്വദേശിനി റംസി എന്നിവരെയാണ് തിരുവല്ലം പോലീസ് അറസ്റ്റ് ചെയ്തിരിക്കുന്നത്. ഈ മാസം 15 നാണ് പ്രതികള് വണ്ടിത്തടത്തെ അപര്ണ്ണ ഫിനാന്സില് നിന്ന് മുക്കുപണ്ടം വച്ച് തട്ടിപ്പ് നടത്തിയത്. അന്നേ ദിവസം ഉച്ചയ്ക്ക് 2.30 ഓടെ വെള്ള മാരുതി സ്വിഫ്റ്റ് കാറിലെത്തിയ പ്രതികള് സ്വര്ണ്ണം എന്ന വ്യാജേനെ 36 ഗ്രാം മുക്കുപണ്ടം പണയം വെച്ച് 1,20,000 രൂപയുമായാണ് കടയില് നിന്നും ഇറങ്ങിയത്.
പണയം വച്ച സ്വര്ണ്ണത്തില് സംശയം തോന്നിയ സ്ഥാപന ഉടമ ഉടനെ പുറത്തിറങ്ങി കാറില് കയറാന് തുടങ്ങിയ പ്രതികളെ വിളിച്ചു. എന്നാല്, പ്രതികള് കാറില് കയറി വേഗത്തില് ഓടിച്ചു പോകുകയായിരുന്നു. പ്രതികള് പൂരിപ്പിച്ച് നല്കിയ ഫോമില് 9 അക്ക ഫോണ് നമ്പറാണ് രേഖപ്പെടുത്തിയിരുന്നത്. സ്ഥാപനത്തില് സി.സി.ടി.വി ഇല്ലാതിരുന്നതിനാല് പ്രതികളെ പെട്ടെന്ന് തിരിച്ചറിയുന്നതിനും കഴിഞ്ഞില്ല. തുടര്ന്ന് ഉടമ നല്കിയ പരാതിയുടെ അടിസ്ഥാനത്തില് വെള്ള സ്വിഫ്റ്റ് കാര് കേന്ദ്രീകരിച്ച് സംഭവ സ്ഥലത്ത് നിന്ന് കുറച്ച് മാറിയുള്ള സി.സി ടി.വി ദൃശ്യങ്ങള് പരിശോധിച്ചാണ് പ്രതികളെ തിരിച്ചറിഞ്ഞത്.
