പാണ്ടനാട് : പാണ്ടനാട്ടിൽ കളക്ടറുടെ ഉത്തരവിൽ കൈയേറ്റം ഒഴിപ്പിച്ച് സർക്കാർ കസ്റ്റഡിയിലാക്കിയ ഭൂമി സ്വകാര്യ വ്യക്തി വീണ്ടും കൈയേറി. നേരത്തേ പമ്പാനദിയുടെ പുറമ്പോക്ക് കണ്ടെത്തി സ്ഥാനനിർണയം നടത്തി നദീപുറമ്പോക്ക് എന്ന ബോർഡും ഇവിടെ സ്ഥാപിച്ചിരുന്നു. നിലവിൽ ഈ ബോർഡടക്കം നശിപ്പിച്ചാണ് സ്ഥലത്ത് സ്വകാര്യ വ്യക്തി കൈയേറ്റം നടത്തിയിരിക്കുന്നത്. പാണ്ടനാട് വില്ലേജിൽ ബ്ലോക്ക് 5-ൽ റീസർവേ 637-ൽപ്പെട്ട പമ്പാനദീ പുറമ്പോക്കിലെ 2.18 ആർ (5.34 സെന്റ്) പുറമ്പോക്കുസ്ഥലമാണ് കൈയേറിയത്. ഈ ഭൂമിയിൽ കരക്കൃഷി ചെയ്യുകയും വൃക്ഷത്തൈകളും മറ്റും നട്ടുവളർത്തുന്നുമുണ്ട്.
കളക്ടർക്കു ലഭിച്ച പരാതിയെത്തുടർന്ന് 2020-ൽ റിവിഷൻ ഹർജി തള്ളിക്കൊണ്ട് 1957-ലെ ഭൂസംരക്ഷണ നിയമപ്രകാരമാണ് കൈയേറ്റം ഒഴിപ്പിച്ച് നിയമാനുസൃതം ബോർഡ് സ്ഥാപിച്ചത്. നടപടികൾക്കായി ചെങ്ങന്നൂർ തഹസിൽദാർക്കാണ് ഉത്തരവു നൽകിയത്. പിന്നീടാണ് കൈയേറ്റഭൂമിയിൽ റവന്യൂ ഉദ്യോഗസ്ഥരെത്തി ബോർഡു സ്ഥാപിച്ചത്. പാണ്ടനാട് പഞ്ചായത്ത് ഒന്നാം വാർഡിന്റെ ഭാഗമാണിത്.
