പത്തനംതിട്ട : കോന്നി ഗവണ്മെന്റ് മെഡിക്കല് കോളേജിന്റെ ശോചനീയാവസ്ഥയും അപര്യാപ്തതകളും പട്ടികയാക്കി ഒ.പി വിഭാഗത്തിന് മുമ്പില് ഭിത്തിയില് ഒട്ടിച്ച സാഹചര്യത്തില് അപര്യാപ്തതകള്ക്ക് ഉത്തരവാദികളായ ആരോഗ്യവകുപ്പ് മന്ത്രിയും കോന്നി എം.എല്.എ യും മറുപടി പറയണമെന്ന് ഡി.സി.സി പ്രസിഡന്റ് പ്രൊഫ. സതീഷ് കൊച്ചുപറമ്പില് ആവശ്യപ്പെട്ടു. യു.ഡി.എഫ് സര്ക്കാരിന്റെ അഭിമാനമായി ആരംഭിച്ച കോന്നി മെഡിക്കല് കോളേജില് ഇപ്പോഴുള്ളത് കെടുകാര്യസ്ഥതയും അരാജകത്വവുമാണെന്ന് പൊതുശസ്ത്രക്രിയാ വിഭാഗം മേധാവിയുടെ വെളിപ്പെടുത്തലോടെ കൂടുതല് വ്യക്തമായിരിക്കുകയാണ്. ആരോഗ്യവകുപ്പ് മന്ത്രിയും എം.എല്.എയും കൊട്ടിഘോഷിച്ചു നടത്തുന്ന ഉദ്ഘാടന മാമാങ്കങ്ങളല്ലാതെ ഒരു മെഡിക്കല് കോളേജിന് വേണ്ട പ്രാഥമിക സൗകര്യങ്ങള് പോലും ഒരുക്കുവാന് കഴിഞ്ഞിട്ടില്ലാത്തത് പ്രതിഷേധാര്ഹമാണെന്നും ഡി.സി.സി പ്രസിഡന്റ് പറഞ്ഞു.
50 ശതമാനം പോലും പണികള്പോലും പൂര്ത്തീകരിക്കാതെ ജില്ലയിലൊട്ടാകെ സര്ക്കാര് പദ്ധതികളുടെ ഉദ്ഘാടന ഘോഷയാത്രയാണ് ഇപ്പോള് നടന്നുകൊണ്ടിരിക്കുന്നതെന്നും ഇത് ജനങ്ങളെ കബളിപ്പിക്കുന്നതിനാണെന്നും ഡി.സി.സി പ്രസിഡന്റ് പറഞ്ഞു. കോന്നി മെഡിക്കല് കോളേജില് ഇപ്പോഴത്തെ ദുരവസ്ഥ പരിഹരിക്കുവാന് അടിയന്തിര നടപടികള് സ്വീകരിക്കുന്നതിനു പകരം യാഥാര്ത്ഥ്യം പുറത്തുകൊണ്ടുവന്ന ജനറല് സര്ജറി വിഭാഗം മേധാവിക്കെതിരെ നടപടി സ്വീകരിച്ച് ബലിയാടാക്കുന്നതിനാണ് മന്ത്രിയുടെയും പരിവാരങ്ങളുടെയും ശ്രമം. മെഡിക്കല് കോളേജിന്റെ ദുരവസ്ഥയ്ക്ക് അടിയന്തിര പരിഹാരം ഉണ്ടായില്ലെങ്കില് ശക്തമായ സമരപരിപാടികള് സംഘടിപ്പിക്കുമെന്ന് ഡി.സി.സി പ്രസിഡന്റ് മുന്നറിയിപ്പ് നല്കി.
