കോന്നി : കോന്നി മെഡിക്കല് കോളേജില് വേണ്ടത്ര സൗകര്യങ്ങള് ഇല്ലാത്തതിനാല് ശസ്ത്രക്രിയയില് വീഴ്ച സംഭവിച്ചാല് ഡോക്ടര് ഉത്തരവാദിയല്ല എന്ന് കാണിച്ച് മെഡിക്കല് കോളേജ് ആശുപത്രിക്കുള്ളില് സര്ജ്ജന് നോട്ടീസ് പതിപ്പിച്ച സംഭവത്തില് പ്രതിഷേധം ആളിക്കത്തുന്നു. കോണ്ഗ്രസ് പ്രവര്ത്തകര് ഇന്ന് മെഡിക്കല് കോളേജിലേക്ക് പ്രതിഷേധ മാര്ച്ച് നടത്തി. കെ.പി.സി.സി സെക്രട്ടറി കറ്റാനം ഷാജി ഉത്ഘാടനം ചെയ്തു. സന്തോഷ് അധ്യക്ഷത വഹിച്ചു. ജില്ലാ പഞ്ചായത്ത് അംഗം എസ്.സന്തോഷ് കുമാര്, കോന്നി ഗ്രാമ പഞ്ചായത്ത് പ്രസിഡന്റ് റോജി എബ്രഹാം, അരുവാപ്പുലം പഞ്ചായത്ത് പ്രസിഡന്റ് ബി.രേഷ്മ, തോമസ് കാലായില്, ജി.ശ്രീകുമാര്, സുമ തുടങ്ങിയവര് സംസാരിച്ചു. പ്രതിഷേധ മാര്ച്ച് മെഡിക്കല് കോളേജ് കവാടത്തില് പോലീസ് തടഞ്ഞു.
വിചിത്രമായ ഒരു സമ്മതപത്രമാണ് കോന്നി മെഡിക്കല് കോളേജില് പതിപ്പിച്ചത്. ഡോക്ടര് പതിപ്പിച്ച നോട്ടീസിലുള്ള കാര്യങ്ങള് വളരെയേറെ ഗൌരവമേറിയതാണ്. തിരുവനന്തപുരം മെഡിക്കല് കോളേജിലെ ഡോ.ഹാരിസ് അവിടുത്തെ കാര്യങ്ങള് പറഞ്ഞത് വാക്കാല് ആണെങ്കില് ഇവിടെ അത് പ്രിന്റ് ചെയ്ത് കോന്നി മെഡിക്കല് കോളേജില് ഒട്ടിച്ചിരിക്കുകയാണെന്നും കോണ്ഗ്രസ് നേതാക്കളായ എസ്.സന്തോഷ് കുമാര്, റോബിന് പീറ്റര് എന്നിവര് പറഞ്ഞു.
