തിരുവല്ല: പ്രശസ്ത വിദ്യാഭ്യാസ ചിന്തകനും മാക്ഫാസ്റ്റ് കോളേജിന്റെ സ്ഥാപകനും ഗ്രന്ഥകര്ത്താവുമായ ഡോ ഫാ എബ്രഹാം മുളമൂട്ടിലിന്റെ വിദ്യാഭ്യാസ സാംസ്കാരിക പ്രവര്ത്തനങ്ങള്ക്കായുള്ള മുളമൂട്ടിലച്ചന് ഫൗണ്ടേഷന്റെ ഉദ്ഘാടനം മെയ് 28ന് നടന്നു. 3 മണിക്ക് തിരുവല്ലയില് നടന്ന ചടങ്ങ് ഡോ. ആര്. ബാലശങ്കര് (മുന് ചീഫ് എഡിറ്റര്, ഓര്ഗനൈസര് വീക്ലി, ഡല്ഹി ) ഉദ്ഘാടനം നിര്വഹിച്ചു. മഹാത്മാ ഗാന്ധി സര്വ്വകലാശാല വൈസ് ചാന്സലര് ഡോ.സാബു തോമസ് മുഖ്യ പ്രഭാഷണം നടത്തി.
ഫൗണ്ടേഷന്റെ പ്രഥമ പുരസ്കാരം, ഇന്ത്യ ഗവണ്മെന്റിന്റെ സയന്സ് ആന്ഡ് ടെക്നോളജി കമ്മ്യൂണിക്കേഷന് അവാര്ഡ് ജേതാവായ ഡോ. ബിജു ധര്മപാലന് നല്കി ആദരിച്ചു. ആര്ട്ടിഫിഷ്യല് ഇന്റലിജന്സ് എന്ന വിഷയത്തെക്കുറിച്ചുള്ള ഫൗണ്ടേഷന്റെ പ്രഥമ പ്രഭാഷണം ഡോ. സജിത്ത് നൈനാന് ഫിലിപ്പ് നിര്വഹിച്ചു. ഫൌണ്ടേഷന് ഭാരവാഹികളായ പ്രൊഫസര് ജോണ് ടി വര്ഗീസ്, ശ്രീ മാത്യൂസ് ഓരത്തേല്, ശ്രീമതി വിമല മാത്യു, ഡോ. ബിജു ധര്മപാലന്, ചവറ ചീഫ് ജുഡീഷ്യല് മജിസ്ട്രേറ്റ് ശ്രീമതി ആശ കോശി, പ്രൊഫസര് പ്രകാശ് നായര് എന്നിവര് സംസാരിച്ചു.
