പത്തനംതിട്ട : സര്ക്കാരിന്റെയും വൈദ്യുതി വകുപ്പിന്റെയും പിടിപ്പുകേടും കടുകാര്യസ്ഥതയുമാണ് ഇപ്പോളുണ്ടാക്കിയിരിക്കുന്ന വൈദ്യുതി നിരക്ക് വര്ദ്ധനയുടെ കാരണമെന്ന് ഡി.സി.സി പ്രസിഡന്റ് പ്രൊഫ. സതീഷ് കൊച്ചുപറമ്പില് പറഞ്ഞു. ജില്ലയിലെ ബ്ലോക്ക്, മണ്ഡലം കോണ്ഗ്രസ് കമ്മിറ്റി പ്രസിഡന്റുമാരുടെ യോഗം പത്തനംതിട്ട രാജീവ് ഭവനില് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. കുറഞ്ഞ നിരക്കില് പുറത്തുനിന്നും വൈദ്യുതി വാങ്ങുന്നതിന് വേണ്ടിയുള്ള ഉമ്മന്ചാണ്ടി സര്ക്കാരിന്റെ ദീര്ഘകാല കരാര് റദ്ദാക്കിയിട്ട് ഉയര്ന്ന നിരക്കില് വൈദ്യുതി വാങ്ങുവാന് പിണറായി സര്ക്കാര് എടുത്ത തീരുമാനം മൂലമാണ് ഇപ്പോള് ഉണ്ടായിരിക്കുന്ന ജനദ്രോഹപരമായ അമിത വൈദ്യുതി നിരക്ക് വര്ദ്ധനയെന്നും ഇതിന്റെ പിന്നില് വന് അഴിമതിയുണ്ടെന്നും ഡി.സി.സി പ്രസിഡന്റ് പറഞ്ഞു. വൈദ്യുതി നിരക്ക് വര്ദ്ധനവിനെതിരെ ശക്തമായ സമരപരിപാടികള്ക്ക് കോണ്ഗ്രസ് നേതൃത്വം നല്കുമെന്ന് അദ്ദേഹം പറഞ്ഞു.
ഡി.സി.സി വൈസ് പ്രസിഡന്റ് അഡ്വ. എ. സുരേഷ് കുമാര്, ഡി.സി.സി സംഘടനാകാര്യ ജനറല് സെക്രട്ടറി സാമുവല് കിഴക്കുപുറം, ജനറല് സെക്രട്ടറിമാരായ ഹരികുമാര് പൂതങ്കര, സജി കൊട്ടയ്ക്കാട്, ബ്ലോക്ക് കോണ്ഗ്രസ് കമ്മിറ്റി പ്രസിഡന്റുമാരായ സക്കറിയ വര്ഗീസ്, സിബി താഴത്തില്ലത്ത്, ദീനാമ്മ റോയി, ജെറി മാത്യു സാം എന്നിവര് പ്രസംഗിച്ചു. ഡിസംബര് 23ന് മുന് മുഖ്യമന്ത്രിയും കോണ്ഗ്രസ് നേതാവുമായിരുന്നു ലീഡര് കെ. കരുണാകരന്റെ ചരമവാര്ഷിക ദിനവും ഡിസംബര് 26ന് മഹാത്മാഗാന്ധി ഇന്ത്യന് നാഷണല് കോണ്ഗ്രസിന്റെ പ്രസിഡന്റായതിന്റെ നൂറാം വാര്ഷികവും ഡിസംബര് 28ന് ഇന്ത്യന് നാഷണല് കോണ്ഗ്രസിന്റെ ജന്മദിനവും വിവിധ പരിപാടികളോടെ ആചരിക്കുന്നതിന് യോഗം തീരുമാനിച്ചു.
