വാഷിംഗ്ടണ്‍ : കിഴക്കന്‍ അതിര്‍ത്തിയില്‍ ചൈനയുടെ വിരട്ടലിനെ അതേ രീതിയില്‍ ചെറുത്തു തോല്‍പ്പിച്ച ഇന്ത്യ ചൈനയ്ക്ക് വീണ്ടും തിരിച്ചടി നല്‍കി. ഇത്തവണ യുഎന്‍ സാമ്പത്തീക സാമൂഹിക കൗണ്‍സിലിന്റെ (ഇ.സി.ഒ.എസ്.ഒ.സി) യു.എന്‍. കമ്മീഷന്‍ ഓണ്‍ സ്റ്റാറ്റസ് ഓഫ് വുമണ്‍ (സിഎസ്ഡബ്ല്യൂ) അംഗമായി ചൈനയെ തോല്‍പ്പിച്ച് ഇന്ത്യ തെരഞ്ഞെടുക്കപ്പെട്ടു.
ലിംഗ സമത്വം, വനിതാശാക്തീകരണം എന്നിവ ലക്ഷ്യമിട്ടുള്ള സമിതിയാണ് ഇത്. 54 രാജ്യങ്ങള്‍ അംഗങ്ങളായ സമിതിയില്‍ അഫ്ഗാനിസ്ഥാനും ഇന്ത്യയും തെരഞ്ഞെടുക്കപ്പെട്ടപ്പോള്‍ ചൈന പിന്നിലായി. അഫ്ഗാന്‍ 39 വോട്ടുകളും ഇന്ത്യ 38 വോട്ടുകളും നേടി. ഏറ്റവും കുറഞ്ഞ ഭൂരിപക്ഷം 28 ആണെന്നിരിക്കെ ദേശീയ സുരക്ഷാ കൗണ്‍സിലില്‍ അംഗമായിട്ട് പോലും ചൈനയ്ക്ക് കിട്ടിയത് 27 വോട്ടുകളാണ്.
അര്‍ജന്റീന, ഓസ്ട്രിയ, ഡൊമിനിക്കന്‍ റിപ്പബ്ലിക്, ഇസ്രായേല്‍, ലാറ്റ്‌വിയ, നൈജീരിയ, തുര്‍ക്കി, സാംബിയ എന്നിവയ്‌ക്കൊപ്പമാണ് ഇന്ത്യയും അഫ്ഗാനും തെരഞ്ഞെടുക്കപ്പെട്ടത്. ലിംഗസമത്വത്തിലും വനിതാ ശാക്തീകരണത്തിലും ഇന്ത്യയുടെ കാട്ടുന്ന പ്രതിജ്ഞാബദ്ധതയ്ക്കുള്ള അംഗീകാരമാണ് ഇതെന്ന് യുഎന്നിലെ ഇന്ത്യയുടെ സ്ഥിരം പ്രതിനിധി ടി എസ് തിരുമൂര്‍ത്തി ട്വിറ്ററിലൂടെ വ്യക്തമാക്കി.
വനിതാ സ്വാതന്ത്ര്യവും ലിംഗ സമത്വവും സംബന്ധിച്ച കാര്യത്തില്‍ ചൈന സ്വന്തം നിലപാട് വീണ്ടും പരിശോധിക്കണമെന്ന സൂചന കൂടിയായി മാറുന്നതായിരുന്നു ഫലം. ജൂണില്‍ യുഎന്‍ രക്ഷാസമിതിയില്‍ താല്‍ക്കാലിക അംഗത്വം ലഭിച്ചതിന് പിന്നാലെയാണ് പുതിയ പദവിയും കിട്ടിയിട്ടുള്ളത്. തിങ്കളാഴ്ച ജനറല്‍ അംസംബ്ലി ഹാളില്‍ 2021 സെഷനിലെ ആദ്യയോഗം ചേരും. നാലു വര്‍ഷത്തേക്കാണ് സമിതിയ്ക്ക് കാലാവധി.
