ന്യൂഡല്‍ഹി: ഫെബ്രുവരി അഞ്ചിന് ധനമന്ത്രി നിര്‍മല സീതാരാമന്‍ പാര്‍ലമെന്‍റില്‍ അവതരിപ്പിക്കുന്ന കേന്ദ്ര ബജറ്റില്‍ കോവിഡ് സെസ് പ്രഖ്യാപിക്കാന്‍ സാധ്യതയെന്ന് റിപ്പോര്‍ട്ട്. കോവിഡ് വാക്സിന്‍ അടക്കം മഹാമാരിയെ പ്രതിരോധിക്കാനുള്ള പ്രവര്‍ത്തനങ്ങള്‍ക്ക് അധിക ഫണ്ട് കണ്ടെത്തുന്നതിനാണ് കോവിഡ് സെസ് ഏര്‍പ്പെടുത്തുന്നത്.
വാക്സിന്‍ കൈമാറ്റം അടക്കമുള്ള കാര്യങ്ങളില്‍ 60,000 മുതല്‍ 65,000 കോടി ചെലവ് വരുമെന്നാണ് കേന്ദ്രം കണക്കാക്കിയിട്ടുള്ളത്. ഇത്രയും വലിയ ഫണ്ട് സ്വരൂപിക്കാന്‍ സാധിക്കില്ലെന്നാണ് സര്‍ക്കാറിന്‍റെ നിലപാട്. അതിനാലാണ് വരുമാന നികുതിയില്‍ കോവിഡ് സെസ് ചുമത്താന്‍ ആലോചിക്കുന്നത്. അതേസമയം, സെസ് ചുമത്തിയാല്‍ അത് ആദായ നികുതി ബാധ്യതയെ എങ്ങനെ ബാധിക്കുമെന്ന് അറിയേണ്ടതുണ്ട്.
നികുതി ദായകരില്‍ നിന്ന് നാല് ശതമാനം ആരോഗ്യ, വിദ്യാഭ്യാസ സെസ് നിലവില്‍ കേന്ദ്ര സര്‍ക്കാര്‍ ഈടാക്കുന്നുണ്ട്. 2018ലെ കേന്ദ്ര ബജറ്റില്‍ അന്നത്തെ ധനമന്ത്രി അരുണ്‍ ജെയ്റ്റ്ലിയാണ് ആരോഗ്യ, വിദ്യാഭ്യാസ സെസ് നടപ്പാക്കിയത്. രാജ്യത്തെ ആരോഗ്യ, വിദ്യാഭ്യാസ മേഖലയിലെ ഉന്നമനത്തിന് വേണ്ടിയാണ് ഈ സെസ് ഉപയോഗിക്കുന്നത്.
2018ന് മുമ്ബ്, 3 ശതമാനം സെസില്‍ നേരിട്ടുള്ള നികുതി വഴി 2 ശതമാനം വിദ്യാഭ്യാസ സെസായും ഒരു ശതമാനം സീനിയര്‍ സെക്കന്‍ഡറി എഡ്യൂക്കേഷന്‍ സെസായും കേന്ദ്ര സര്‍ക്കാര്‍ ഈടാക്കിയിരുന്നു.
