ന്യൂഡൽഹി : രാജ്യത്ത് വർധിച്ചുവരുന്ന ജീവിതച്ചെലവും ഇന്ധനവിലക്കയറ്റവും വായ്പാനിരക്കുകളും വകവെക്കാതെ ഇന്ത്യൻ വാഹനവിപണിയിൽ വൻ മുന്നേറ്റം. കഴിഞ്ഞ മെയ് മാസത്തിൽ മാത്രം രാജ്യത്ത് 25 ലക്ഷത്തിലധികം വാഹനങ്ങളാണ് വിറ്റഴിച്ചതെന്നാണ് റിപ്പോർട്ടുകൾ സൂചിപ്പിക്കുന്നത്. അതായത് പ്രതിദിനം എൺപതിനായിരത്തിലധികം വാഹനങ്ങളും, ഓരോ മിനിറ്റിലും ശരാശരി 55 പുതിയ വാഹനങ്ങളും ഇന്ത്യൻ നിരത്തുകളിലേക്ക് എത്തുന്നുണ്ട്. ഒരു കാലത്ത് ആഡംബരമായിരുന്ന കാറുകൾ ഇന്ന് സാധാരണക്കാരുടെ അടക്കം നിത്യജീവിതത്തിലെ ഒഴിച്ചുകൂടാനാവാത്ത ആവശ്യമായി മാറിയതാണ് വിപണിയിലെ ഈ വലിയ മാറ്റത്തിന് കാരണം. ഇന്ത്യൻ മധ്യവർഗത്തിന്റെ ജീവിതനിലവാരത്തിലുണ്ടായ ഗുണപരമായ മാറ്റവും യാത്രാസൗകര്യങ്ങൾക്കും സാമൂഹിക പദവിക്കും നൽകുന്ന മുൻഗണനയും ഈ റെക്കോർഡ് വിൽപ്പനയ്ക്ക് കരുത്തുപകരുന്നു.
വാഹനവിപണിയിൽ നിലവിൽ സ്പോർട്സ് യൂട്ടിലിറ്റി വാഹനങ്ങൾക്കാണ് (SUV) പ്രിയമേറുന്നത്. ഇന്ധനവില വർധനവ് ഈ വിഭാഗത്തിലെ വിൽപ്പനയെ ബാധിച്ചിട്ടില്ലെന്ന് മാത്രമല്ല, പ്രമുഖ കമ്പനികളെല്ലാം തന്നെ റെക്കോർഡ് വിൽപ്പനയാണ് രേഖപ്പെടുത്തുന്നത്.
പെട്രോൾ, ഡീസൽ വാഹനങ്ങൾക്കൊപ്പം സി.എൻ.ജി (CNG), ഇലക്ട്രിക് (EV) വാഹനങ്ങളിലേക്കും ഉപഭോക്താക്കൾ വൻതോതിൽ ചുവടുമാറ്റുന്നുണ്ട്. പ്രമുഖ നിർമാതാക്കളായ മാരുതി സുസുക്കിക്ക് മാത്രം സി.എൻ.ജി ബുക്കിംഗുകളിൽ 40 ശതമാനം വളർച്ചയും, ഇലക്ട്രിക് വാഹനങ്ങളുടെ ആവശ്യകതയിൽ ഇരട്ടിയിലധികം വർധനവും ഇക്കാലയളവിൽ ഉണ്ടായിട്ടുണ്ട്. കാറുകൾക്ക് പുറമെ രാജ്യത്തെ ഇരുചക്ര വാഹന വിപണിയും ശക്തമായ തിരിച്ചുവരവിന്റെ പാതയിലാണ്. ഹോണ്ട, ടി.വി.എസ്, സുസുക്കി, ബജാജ് തുടങ്ങിയ മുൻനിര ബ്രാൻഡുകളെല്ലാം മെയ് മാസത്തിൽ മികച്ച വിൽപ്പന വളർച്ച കൈവരിച്ചു.
