രാജ്യത്ത് കൊവിഡ് രോഗബാധിതരുടെ എണ്ണം ഒരു ലക്ഷം കടന്നു ; മരണം 3163 ആയി

ഡല്‍ഹി : രാജ്യത്ത് കൊവിഡ് രോഗബാധിരുടെ എണ്ണം ഒരു ലക്ഷം കടന്നു. 24 മണിക്കൂറിനിടെ 4970 പേര്‍ക്കാണ് പുതുതായി രോഗബാധ സ്ഥിരീകരിച്ചത്. ഇതോടെ രാജ്യത്തെ കൊവിഡ് രോഗികളുടെ എണ്ണം 1,01,139 ആയി. മഹാരാഷ്ട്ര, ഗുജറാത്ത്, ഡല്‍ഹി, തമിഴ്‌നാട്, രാജസ്ഥാന്‍, മധ്യപ്രദേശ്, ഉത്തര്‍പ്രദേശ് എന്നീ സംസ്ഥാനങ്ങളില്‍ കൊവിഡ് വ്യാപനം രൂക്ഷമാണ്. കഴിഞ്ഞ ഒരു ദിവസത്തനിടെ രാജ്യത്ത് 134 പേരാണ് മരിച്ചത്. ഇതോടെ രാജ്യത്ത് കൊവിഡ് മരണം 3163 ആയി ഉയര്‍ന്നു. മുംബൈ നഗരമാണ് രോഗബാധയില്‍ ഏറ്റവും കൂടുതല്‍ ആശങ്കയുയര്‍ത്തുന്നത് . മുംബൈയില്‍ മാത്രം 21,152 പേര്‍ക്കാണ് രോഗം സ്ഥിരീകരിച്ചിട്ടുള്ളത്. മഹാരാഷ്ട്രയില്‍ കൊവിഡ് ബാധിതരുടെ എണ്ണം 35,000 കവിഞ്ഞു. ഇന്നലെ മാത്രം 2,033 പേര്‍ക്കാണ് കൊവിഡ് സ്ഥിരീകരിച്ചത്. 23 പേര്‍ മരിച്ചു. മുംബൈയില്‍ ആയിരത്തിലധികം പോലീസുകാര്‍ക്ക് രോഗം ബാധിക്കുകയും 12 പോലീസുകാര്‍ മരിക്കുകയും ചെയ്ത സാഹചര്യത്തില്‍ നഗരത്തില്‍  കേന്ദ്രസേനയെ വിന്യസിപ്പിക്കും. സിഐഎസ്എഫ്, സിആര്‍പിഎഫ് സേനാവിഭാഗങ്ങള്‍ ഇന്ന് മുംബൈയില്‍ എത്തും. രാജ്യത്ത്‌ 60000 പേരാണ്‌ ചികിത്സയിൽ ഉള്ളത്.‌ 40000 ത്തോളം പേർ രോഗമുക്തി നേടുകയും ചെയ്തു.