പത്തനംതിട്ട : ഇന്ത്യയിലെ ജനങ്ങളുടെ തൊഴില്‍, പാര്‍പ്പിടം, വിവരങ്ങള്‍ അറിയുവാനുള്ള അവകാശം എന്നിവ ഉള്‍പ്പെടെ കോടിക്കണക്കിന് ജനങ്ങള്‍ക്ക് നല്‍കുന്ന അവകാശങ്ങള്‍ ഉറപ്പു നല്‍കുന്ന രാഷ്ട്രീയ സംവിധാനമാണ് ഇന്ത്യ മുന്നണിയെന്ന് സി.എം.പി സംസ്ഥാന സെക്രട്ടറി സി.പി ജോണ്‍ പ്രസ്താവിച്ചു. ജനങ്ങളുടെ മൗലീകാവകാശങ്ങള്‍ ചവിട്ടി മെതിച്ച് വര്‍ഗീയ വിഭജനം നടത്തുന്ന ബി.ജെ.പി നടത്തുന്നത് രാഷ്ട്രീയ വൈകൃതമാണെന്ന് അദ്ദേഹം പറഞ്ഞു. യു.ഡി.എഫ് ജില്ലാ കമ്മിറ്റി പത്തനംതിട്ടയില്‍ സംഘടിപ്പിച്ച സംവാദ സദസ്സ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. കിഫ്ബിയിലൂടെ കേരളത്തിന്‍റെ സമ്പദ്ഘടനയുടെ മരണമണി മുഴക്കിയതായി അദ്ദേഹം പറഞ്ഞു. ഇതിന് കാരണക്കാരനായ ധനകാര്യ മന്ത്രിയുടെ പരാജയം ഉറപ്പാക്കേണ്ടത് വരുംതലമുറയ്ക്ക് വേണ്ടി പത്തനംതിട്ട പാര്‍ലമെന്‍റിലെ വോട്ടര്‍മാര്‍ ഏറ്റെടുക്കേണ്ട കര്‍മ്മമാണെന്ന് അദ്ദേഹം പറഞ്ഞു. കേരളത്തില്‍ 20 സീറ്റുകളില്‍ യു.ഡി.എഫ് മുന്നേറുമെന്നും ഇന്ത്യ മുന്നണിയുടെ നേതൃത്വത്തില്‍ പുതിയ സര്‍ക്കാര്‍ അധികാരത്തിലെത്തുമെന്നും അദ്ദേഹം പറഞ്ഞു.
ഡി.സി.സി പ്രസിഡന്‍റ് പ്രൊഫ. സതീഷ് കൊച്ചുപറമ്പില്‍ മോഡറേറ്റര്‍ ആയിരുന്നു. കെ.പി.സി.സി ജനറല്‍ സെക്രട്ടറി അഡ്വ. പഴകുളം മധു, എ. ഷംസുദ്ദീന്‍, അഡ്വ. കെ.എസ്.ശിവകുമാര്‍, തങ്കമ്മ രാജന്‍, എ. സുരേഷ് കുമാര്‍, സാമുവല്‍ കിഴക്കുപുറം, ജി. രഘുനാഥ്, സജി കൊട്ടയ്ക്കാട്, അനില്‍ തോമസ്, സിന്ധു അനില്‍ എംസി ഷെരീഫ്, ഷാം കുരുവിള, കെ. ജാസിംകുട്ടി, എലിസബത്ത് അബു, രജനി പ്രദീപ്, റോജി പോള്‍ദാനിയല്‍ എന്നിവര്‍ പ്രസംഗിച്ചു. ചര്‍ച്ചകളില്‍ പ്രൊഫ. ജി ജോണ്‍,ശ്യാം.എസ്. കോന്നി, അജിത് മണ്ണില്‍, പെരുമ്പുളിക്കല്‍ ജ്യേതിഷ്കുമാര്‍, മഞ്ജു വിശ്വനാഥ്, ലാലി ജോണ്‍, ഗീതാ ചന്ദ്രന്‍, സുധാ നായര്‍, റെനീസ് മുഹമ്മദ്, ഷാജി കുളനട എന്നിവര്‍ പങ്കെടുത്തു.
