ന്യൂയോര്ക്ക് : കാലാവസ്ഥാ വ്യതിയാനം ആഗോള സുരക്ഷയ്ക്കും സമാധാനത്തിനും വെല്ലുവിളിയാണെന്ന യുഎന് രക്ഷാസമിതി പ്രമേയത്തെ എതിര്ത്ത് വോട്ടുചെയ്ത് ഇന്ത്യ. ചൈന വിട്ടുനിന്നു. റഷ്യ പ്രമേയത്തെ വീറ്റോ ചെയ്തതോടെ ആഗോളതാപനത്തില് കേന്ദ്രീകരിച്ചുള്ള നയരൂപീകരണം എന്ന രക്ഷാസമിതിയുടെ ലക്ഷ്യത്തിന് തിരിച്ചടി. ആഫ്രിക്കന് രാജ്യങ്ങളിലും ഇറാഖിലും ഉള്പ്പെടെ കാലാവസ്ഥാ വ്യതിയാനം ഉയര്ത്തുന്ന സുരക്ഷാപ്രശ്നങ്ങളെപ്പറ്റി 2007ല് രക്ഷാസമിതി പ്രമേയം പാസാക്കി. ഇതിനുശേഷം പലപ്പോഴായി വിഷയം ചര്ച്ചയ്ക്കുവന്നു.
കാലാവസ്ഥാ വ്യതിയാനം തന്നെ സുരക്ഷാപ്രശ്നമാണെന്ന തരത്തിലുള്ള ആദ്യ പ്രമേയമായിരുന്നു തിങ്കളാഴ്ചത്തേത്. അയര്ലന്ഡും നൈജറുമാണ് പ്രമേയം മുന്നോട്ടുവച്ചത്. രക്ഷാസമിതിയിലെ 15 അംഗങ്ങളില് 12 പേരാണ് അനുകൂലിച്ചത്. റഷ്യന് നടപടിയെ അമേരിക്ക വിമര്ശിച്ചു. യുഎന്നിന്റെ കാലാവസ്ഥാ വ്യതിയാനവുമായി ബന്ധപ്പെട്ട സമിതികള് ചര്ച്ച ചെയ്യേണ്ട വിഷയമാണ് പ്രമേയത്തിലുള്ളതെന്ന് എതിര്ത്ത രാജ്യങ്ങള് അവകാശപ്പെട്ടു. ശാസ്ത്രീയവും സാമ്പത്തികവുമായി വിഷയത്തെ രാഷ്ട്രീയവല്ക്കരിക്കുന്നത് അണുബോംബിന്റെ ഫലം ചെയ്യുമെന്ന് റഷ്യന് സ്ഥാനപതി വാസ്സിലി നെബെന്സിയ പറഞ്ഞു. പ്രമേയം ഗ്ലാസ്ഗോ ഉച്ചകോടിയിലുണ്ടായ സമവായം അട്ടിമറിക്കുമെന്ന് ഇന്ത്യയുടെ സ്ഥിരം പ്രതിനിധി ടി.എസ് തിരുമൂര്ത്തി പറഞ്ഞു.
