പത്തനംതിട്ട : കോൺഗ്രസ് അനുകൂല അഭിഭാഷക സംഘടനയായ ഇന്ത്യൻ ലോയേഴ്സ് കോൺഗ്രസിന്റെ അംഗത്വ വിതരണം ആരംഭിച്ചു. ജില്ലയിലെ നാല് കോർട്ട് സെന്ററുകളിലായി നടക്കുന്ന അംഗത്വ വിതരണം ഈ മാസം 30 ന് അവസാനിക്കും. ജില്ലയിലെ ഏറ്റവും വലിയ അഭിഭാഷക സംഘടനയായി ഇന്ത്യൻ ലോയേഴ്സ് കോൺഗ്രസിനെ മാറ്റുവാനുള്ള ശ്രമങ്ങൾ തുടങ്ങിയതായും കോൺഗ്രസ് പ്രവർത്തകർക്കെതിരായ കേസുകൾ പിണറായി സർക്കാരിന്റെ കാലത്ത് ക്രമാതീതമായി വർദ്ധിക്കുകയാണെന്നും ഇതിനെതിരായി ലോയേഴ്സ് കോൺഗ്രസ് നിയമപരമായ സഹായം ചെയ്യുമെന്നും ജില്ലാ അംഗത്വ വിതരണം ഉദ്ഘാടനം ചെയ്ത ഡിസിസി വൈസ് പ്രസിഡന്റ് അഡ്വ. എ.സുരേഷ് കുമാർ പറഞ്ഞു. ജില്ലാ പ്രസിഡന്റ് അഡ്വ. എബ്രഹാം മാത്യു പനച്ചമൂട്ടിൽ അധ്യക്ഷത വഹിച്ചു. ഡിസിസി ഭാരവാഹികളായ അഡ്വ. സുനിൽ.എസ്.ലാൽ, അഡ്വ. വി.ആർ.സോജി, അഡ്വ. റോഷൻ നായർ, ജോമോൻ എന്നിവർ പ്രസംഗിച്ചു.
