മുംബൈ : രാജ്യത്തെ മലയാളികള് അടക്കമുള്ള ഇന്ത്യക്കാര്ക്ക് റുപേ, യുപിഐ സേവനങ്ങള് ലഭ്യമാക്കാന് ഇനി ഒമാനും. ഒക്ടോബര് മൂന്ന്, നാല് ദിവസങ്ങളിലാണ് വിദേശകാര്യ സഹമന്ത്രി വി.മുരളീധരന് ഒമാനിലെത്തുക. ഒമാന് വിദേശകാര്യ മന്ത്രി സയ്യിജ് ബദര് ബിന് ഹമദ് ബിന് ഹമൂദ് അല്ബുസയ്ദിയുമായി അദ്ദേഹം കൂടിക്കാഴ്ച നടത്തും. ഒമാനില് മൊത്തം 6.5 ലക്ഷത്തോളം ഇന്ത്യക്കാരുണ്ട്.
വി. മുരളീധരന്റെ ഒമാന് സന്ദര്ശന വേളയില് നാഷണല് പേമെന്റ്സ് കോര്പറേഷന് ഓഫ് ഇന്ത്യയും (എന്പിസിഐ) സെന്ട്രല് ബാങ്ക് ഓഫ് ഒമാനും (സിബിഒ) ഡിജിറ്റല് സാമ്പത്തിക പണമിടപാട് സേവനങ്ങള്ക്കായുള്ള സഹകരണത്തിനുള്ള കരാര് ഒപ്പിടും. 2018 ല് സിങ്കപ്പുരിലും പിന്നാലെ ഭൂട്ടാന്, മാലിദീപ് എന്നിവിടങ്ങളിലും റൂപേ സേവനം അവതരിപ്പിച്ചിരുന്നു. ഭൂട്ടാന്, സിങ്കപ്പുർ, യുഎഇ എന്നിവിടങ്ങളില് യുപിഐ സേവനങ്ങളും ലഭ്യമാണ്.
