വാട്ടര് അതോറിറ്റി റാന്നി സബ് ഡിവിഷന് ഓഫീസ് കെട്ടിട ഉദ്ഘാടനം നാളെ (14)
ആധുനിക സൗകര്യങ്ങളോടെ നിര്മിച്ച വാട്ടര് അതോറിറ്റി റാന്നി സബ് ഡിവിഷന് ഓഫീസ് കെട്ടിട ഉദ്ഘാടനം ജലവിഭവവകുപ്പ് മന്ത്രി റോഷി അഗസ്റ്റിന് നാളെ (14) റാന്നി ആനപ്പാറമലയില് ഉച്ചകഴിഞ്ഞ് 3.30ന് നിര്വഹിക്കും. 75 ലക്ഷം രൂപ വിനിയോഗിച്ചാണ് പുതിയ കെട്ടിടം നിര്മിച്ചിരിക്കുന്നത്. ആരോഗ്യ മന്ത്രി വീണാ ജോര്ജ് അധ്യക്ഷത വഹിക്കുന്ന ചടങ്ങില് അഡ്വ. പ്രമോദ് നാരായണ് എംഎല്എ മുഖ്യപ്രഭാഷണം നിര്വഹിക്കും. ആന്റോ ആന്റണി എംപി, അഡ്വ. കെ.യു. ജനീഷ് കുമാര് എംഎല്എ, ജില്ലാ പഞ്ചായത്ത് പ്രസിഡന്റ് അഡ്വ. ഓമല്ലൂര് ശങ്കരന്, ജില്ലാ കളക്ടര് ഡോ. ദിവ്യ എസ് അയ്യര്, മുന് എംഎല്എ രാജു എബ്രാഹാം എന്നിവര് മുഖ്യ അതിഥികളാകും. റാന്നി ബ്ലോക്ക് പഞ്ചായത്ത് പ്രസിഡന്റ് കെ.എസ്. ഗോപി, വിവിധ ഗ്രാമ പഞ്ചായത്ത് അധ്യക്ഷന്മാര്, ജില്ലാ പഞ്ചായത്തംഗങ്ങള്, വിവിധ രാഷ്ട്രീയ കക്ഷി നേതാക്കള് തുടങ്ങിയവര് പങ്കെടുക്കും.
ഉന്നതവിദ്യാഭ്യാസത്തിന് ധനസഹായം ലഭിക്കും
വിധവകളുടെ മക്കള്ക്ക് ഉന്നതവിദ്യാഭ്യാസത്തിനുളള ധനസഹായം പടവുകള് 2022-23 സാമ്പത്തിക വര്ഷത്തേക്ക് ധനസഹായം അനുവദിക്കുന്നതിനായി ഓണ്ലൈന് വെബ്സൈറ്റ് മുഖേന അപേക്ഷകള് ക്ഷണിച്ചു. വിശദവിവരങ്ങള് www.schemes.wcd.kerala.gov.in എന്ന വെബ്സൈറ്റില് ലഭ്യമാണ്. അപേക്ഷ ഓണ്ലൈനായി സമര്പ്പിക്കേണ്ട അവസാനതീയതി ജനുവരി 31.ഫോണ്: 0468 2 966 649.
റീ ടെന്ഡര് ക്ഷണിച്ചു
പറക്കോട് ബ്ലോക്ക് പഞ്ചായത്തിന്റെ വാര്ഷിക പദ്ധതി പ്രകാരമുളള ജെന്ഡര് റിസോഴ്സ് സെന്ററിലെ കമ്മ്യൂണിറ്റി വുമണ് ഫെസിലിറ്റേറ്ററുടെ ഓഫീസിലേക്ക് മേശ, കസേര, അലമാര, ഫാന് തുടങ്ങിയ ഫര്ണിച്ചറുകള്/ഉപകരണങ്ങള് നല്കുന്നതിന് അംഗീകൃത ഏജന്സികളില് നിന്നും റീ ടെന്ഡര് ക്ഷണിച്ചു. റീ ടെന്ഡര് സ്വീകരിക്കുന്ന അവസാന തീയതി ഡിസംബര് 17ന് ഉച്ചയ്ക്ക് 12 വരെ. വിവരങ്ങള്ക്ക് പറക്കോട് ബ്ലോക്ക് പഞ്ചായത്ത് ഓഫീസിന് സമീപം പ്രവര്ത്തിക്കുന്ന പറക്കോട് അഡീഷണല് ശിശു വികസന പദ്ധതി ഓഫീസുമായി ബന്ധപ്പെടണം. ഫോണ് : 04734 216444, 9961 629 054.
ആസൂത്രണ സമിതി 17 ന്
ജില്ലാ ആസൂത്രണ സമിതി യോഗം ഡിസംബര് 17 ന് രാവിലെ 11 ന് കളക്ടറേറ്റ് കോണ്ഫറന്സ് ഹാളില് ചേരും.
ജില്ലയിലെ റേഷന് കടകളുടെ പ്രവര്ത്തന സമയം പുതുക്കി നിശ്ചയിച്ചു
പത്തനംതിട്ട ജില്ലയില് റേഷന്കടകളുടെ പ്രവര്ത്തന സമയം ഡിസംബര് അഞ്ചു മുതല് 31 വരെയുളളത് പുതുക്കി നിശ്ചയിച്ചു. ഡിസംബര് 19 മുതല് 24 വരെ രാവിലെ എട്ട് മുതല് ഉച്ചയ്ക്ക് ഒന്ന് വരെയാണ് പ്രവര്ത്തനം. ഡിസംബര് 12 മുതല് 17 വരെയും 26 മുതല് 31 വരെയും ഉച്ചയ്ക്ക് ശേഷം രണ്ട് മണി മുതല് രാത്രി ഏഴ് വരെയാണ് റേഷന് കടകളുടെ പ്രവര്ത്തനസമയം.
പരീക്ഷാ ഫലം പ്രസിദ്ധീകരിച്ചു
ഐ.എച്ച്.ആര്.ഡി 2022 ആഗസ്റ്റ്- സെപ്റ്റംബര് മാസത്തില് നടത്തിയ ഒന്നും രണ്ടും സെമസ്റ്റര് പോസ്റ്റ് ഗ്രാജ്വേറ്റ് ഡിപ്ലോമ ഇന് കമ്പ്യൂട്ടര് ആപ്ലിക്കേഷന്സ് (പി.ജി.ഡി.സി.എ)/ ഒന്നും രണ്ടും സെമസ്റ്റര് ഡിപ്ലോമ ഇന് ഡാറ്റാ എന്ട്രി ടെക്നിക്സ് ആന്റ് ഓഫീസ് ഓട്ടോമേഷന് (ഡി.ഡി.റ്റി.ഒ.എ)/ ഡിപ്ലോമ ഇന് കമ്പ്യൂട്ടര് ആപ്ലിക്കേഷന്സ് (ഡി.സി.എ), സര്ട്ടിഫിക്കറ്റ് കോഴ്സ് ഇന് ലൈബ്രറി ആന്റ് ഇന്ഫര്മേഷന് സയന്സ് (സി.സി.എല്.ഐ.എസ്), പോസ്റ്റ് ഗ്രാജ്വേറ്റ് ഡിപ്ലോമ ഇന് സൈബര് ഫോറന്സിക്സ് ആന്റ് സെക്യൂരിറ്റി (പി.ജി.ഡി.സി.എഫ്) എന്നീ കോഴ്സുകളുടെ റഗുലര് / സപ്ലിമെന്ററി പരീക്ഷകളുടെ ഫലം പ്രസിദ്ധീകരിച്ചു. പരീക്ഷാഫലവും മാര്ക്കിന്റെ വിശദാംശങ്ങളും അതാത് പരീക്ഷാകേന്ദ്രങ്ങളിലും ഐ.എച്ച്.ആര്.ഡി. വെബ്സൈറ്റിലും (www.ihrd.ac.in) പരീക്ഷാഫലം പ്രസിദ്ധീകരിച്ചിട്ടുണ്ട്. പുനര്മൂല്യനിര്ണയത്തിനുള്ള അപേക്ഷകള് ഡിസംബര് 22 വരെ അതാത് പരീക്ഷാകേന്ദ്രങ്ങളില് പിഴ കൂടാതെയും ഈ മാസം 24 വരെ 200 രൂപ ലേറ്റ് ഫീ സഹിതവും സമര്പ്പിക്കാം. ഫെബ്രുവരി 2023-ലെ സപ്ലിമെന്ററി പരീക്ഷയ്ക്കുള്ള അപേക്ഷകള് ഡിസംബര് 19 നു മുന്പായും 100 രൂപ ലേറ്റ് ഫീയോടുകൂടി 22 വരെയും സമര്പ്പിക്കാം. ഫെബ്രുവരി 2023-ലെ 2018 സ്കീം സപ്ലിമെന്ററി പരീക്ഷയ്ക്കായുള്ള പ്രത്യേകാനുമതി ആവശ്യമുള്ളവര് അപേക്ഷകള് ഡിസംബര് 19നു മുന്പായും 200 രൂപ ലേറ്റ് ഫീയോടുകൂടി 22 വരെയും അതാത് സ്ഥാപനമേധാവികള് മുഖേന സമര്പ്പിക്കണം. നിര്ദ്ദിഷ്ട തീയതിക്കുശേഷം ലഭിക്കുന്ന അപേക്ഷകള് പരിഗണിക്കുന്നതല്ല.
