ഹര് ഘര് തിരംഗ: ജില്ലയില് കുടുംബശ്രീ ഒരുക്കുന്നത് 1.50 ലക്ഷം ദേശീയ പതാകകള്
സ്വാതന്ത്ര്യത്തിന്റെ 75-ാം വാര്ഷികാഘോഷത്തോട് അനുബന്ധിച്ച് പത്തനംതിട്ട ജില്ലയിലെ സര്ക്കാര്, പൊതുമേഖല, സ്വയംഭരണ സ്ഥാപനങ്ങളിലും വിദ്യാഭ്യാസ സ്ഥാപനങ്ങളിലും വീടുകളിലും കുടുംബശ്രീ തയാറാക്കിയ 1.50 ലക്ഷം ദേശീയ പതാകകള് പാറിപ്പറക്കും. കുടുംബശ്രീയുടെ 86 യൂണിറ്റുകളിലായാണ് പതാക നിര്മാണം പുരോഗമിക്കുന്നതെന്ന് കുടുംബശ്രീ ജില്ലാ മിഷന് കോ- ഓര്ഡിനേറ്റര് അഭിലാഷ് ദിവാകര് അറിയിച്ചു. തദ്ദേശ സ്വയംഭരണ സ്ഥാപനങ്ങള് മുഖേന 150040 പതാകകള്ക്കാണ് ഓര്ഡര് ലഭിച്ചത്. കൂടാതെ വിവിധ സര്ക്കാര് വകുപ്പുകളുടെയും ഓര്ഡര് ലഭിച്ചിട്ടുണ്ട്. പതാകയുടെ വിതരണം തദ്ദേശ സ്വയംഭരണ സ്ഥാപനങ്ങളും കുടുംബശ്രീയും ചേര്ന്ന് നിര്വഹിക്കും.
30 രൂപയാണ് പതാകയുടെ വില. ഓഗസ്റ്റ് 10, 11 തീയതികളില് സ്കൂളുകളിലും ഓഗസ്റ്റ് 12ന് വീടുകളിലും പതാക വിതരണം പൂര്ത്തിയാക്കും. ഹര് ഘര് തിരംഗയുടെ ഭാഗമായി ഓഗസ്റ്റ് 13 മുതല് 15 വരെ ദേശീയ പതാക ഉയര്ത്തണമെന്നാണ് സര്ക്കാര് നിര്ദേശം. ഇതിന്റെ ഭാഗമായി 30×20 ഇഞ്ച് പതാകയാണ് കുടുംബശ്രീ യൂണിറ്റുകള് തയാറാക്കുന്നത്. സ്വാതന്ത്ര്യത്തിന്റെ അമൃതമഹോത്സവത്തിന്റെ ഭാഗമായി ദേശീയ പതാകയ്ക്ക് ആദരം നല്കുന്നതോടൊപ്പം പൗരന്മാര്ക്ക് ദേശീയ പതാകയോട് വൈകാരിക ബന്ധം വളര്ത്തുന്നതിനും ദേശീയോദ്ഗ്രഥനത്തിന് പ്രചോദനം നല്കുന്നതിനും ലക്ഷ്യമിട്ടാണ് ഹര് ഘര് തിരംഗ പ്രചാരണ പരിപാടി നടത്തുന്നത്. രാപകലില്ലാതെ ദേശീയ പതാക തയാറാക്കുന്ന പ്രവര്ത്തനത്തിലാണ് കുടുംബശ്രീ അംഗങ്ങള്. ദേശീയ പതാക നിര്മ്മിക്കുന്നതോടൊപ്പം അംഗങ്ങളുടെ വീടുകളില് ദേശീയ പതാക ഉയര്ത്തി ത്രിവര്ണതരംഗത്തില് കുടുംബശ്രീ യൂണിറ്റുകളും പങ്കാളികളാകും.
ഹര് ഘര് തിരംഗ: പത്തനംതിട്ട ജില്ലയില് വിപുലമായി ആഘോഷിക്കും
സ്വാതന്ത്ര്യത്തിന്റെ 75-ാം വാര്ഷികാഘോഷത്തിന്റെ ഭാഗമായി വീടുകളില് ദേശീയ പതാക ഉയര്ത്താനുള്ള ‘ഹര് ഘര് തിരംഗ’ പത്തനംതിട്ട ജില്ലയില് വിപുലമായി ആഘോഷിക്കും. ഇതിന്റെ ഭാഗമായി ജില്ലയിലെ മുഴുവന് സര്ക്കാര്, പൊതുമേഖലാ, സ്വയംഭരണ സ്ഥാപനങ്ങളിലും സര്ക്കാര് കെട്ടിടങ്ങള്, പൗരസമൂഹങ്ങള്, സ്ഥാപനങ്ങള്, വിദ്യാഭ്യാസ സ്ഥാപനങ്ങള്, സ്വകാര്യ സ്ഥാപനങ്ങള് എന്നിവിടങ്ങളില് ദേശീയ പതാക ഉയര്ത്തണമെന്നു സര്ക്കാര് നിര്ദേശിച്ചു. ഇതിന്റെ ഭാഗമായി സംസ്ഥാന സര്ക്കാര് ജീവനക്കാര്, പൊതുമേഖലാ സ്ഥാപനങ്ങളിലെ ജീവനക്കാര്, സ്വയംഭരണ സ്ഥാപനങ്ങളിലെ ജീവക്കാര് തുടങ്ങിയവര് അവരവരുടെ വസതികളില് ദേശീയ പതാക ഉയര്ത്തണമെന്നും നിര്ദേശമുണ്ട്.
ഓഗസ്റ്റ് 13 മുതല് 15 വരെ രാജ്യത്തെ വീടുകളില് ദേശീയ പതാക ഉയര്ത്തുന്നതിനായാണു ഹര് ഘര് തിരംഗ സംഘടിപ്പിക്കുന്നത്. ഇതിന്റെ ഭാഗമായി വീടുകളില് ദേശീയ പതാക രാത്രിയില് താഴ്ത്തേണ്ടതില്ല. എങ്കിലും ഫ്ളാഗ് കോഡിലെ നിര്ദേശങ്ങള് കര്ശനമായി പാലിക്കണം. കോട്ടണ്, പോളിസ്റ്റര്, കമ്പിളി, സില്ക്ക്, ഖാദി തുണി എന്നിവ ഉപയോഗിച്ചു കൈകൊണ്ടു നൂല്ക്കുന്നതോ നെയ്തതോ മെഷീനില് നിര്മിച്ചതോ ആയ ദേശീയ പതാകയാണ് ഉപയോഗിക്കേണ്ടത്. ദേശീയ പതാക ദീര്ഘചതുരാകൃതിയിലായിരിക്കണം. ഏതു വലുപ്പവും ആകാം, എന്നാല്, പതാകയുടെ നീളവും ഉയരവും (വീതി) തമ്മിലുള്ള അനുപാതം 3:2 ആയിരിക്കണം.
പതാക പ്രദര്ശിപ്പിക്കുമ്പോഴെല്ലാം ആദരവോടെയും വ്യക്തതയോടെയുമാകണം സ്ഥാപിക്കേണ്ടത്. കേടുപാടുള്ളതോ വൃത്തിയില്ലാത്തതോ കീറിയതോ ആയ പതാക ഉയര്ത്താന് പാടില്ല. മറ്റേതെങ്കിലും പതാകയ്ക്കൊപ്പം ഒരേസമയം ഒരു കൊടിമരത്തില് ദേശീയ പതാക ഉയര്ത്താന് പാടില്ല. തലതിരിഞ്ഞ രീതിയില് ദേശീയ പതാക പ്രദര്ശിപ്പിക്കരുത്. തോരണം, റോസെറ്റ് തുടങ്ങിയ അലങ്കാര രൂപത്തില് ഉപയോഗിക്കരുത്. പതാക തറയിലോ നിലത്തോ തൊടാന് അനുവദിക്കരുത്. പതാകയില് എഴുത്തുകള് പാടില്ല. കെട്ടിടങ്ങളുടെ മുന്വശത്തോ ജനല്പ്പാളിയിലോ ബാല്ക്കണിയിലോ തിരശ്ചീനമായി ദേശീയ പതാക പ്രദര്ശിപ്പിക്കുമ്പോള് സാഫ്റോണ് ബാന്ഡ് ദണ്ഡിന്റെ അറ്റത്ത് വരത്തക്കവിധമാണ് കെട്ടേണ്ടത്.
രാഷ്ട്രപതി, ഉപരാഷ്ട്രപതി, പ്രധാനമന്ത്രി, ഗവര്ണര്മാര് തുടങ്ങിയ ഫ്ളാഗ് കോഡില് പരാമര്ശിച്ചിരിക്കുന്ന വിശിഷ്ട വ്യക്തികളുടേതൊഴികെ ഒരു വാഹനത്തിലും പതാക ഉയര്ത്താന് പാടില്ല. മറ്റേതെങ്കിലും പതാക ദേശീയ പതാകയ്ക്കു മുകളിലായോ അരികിലോ സ്ഥാപിക്കരുതെന്നും ഫ്ളാഗ് കോഡില് പറയുന്നു. ഈ നിര്ദേശങ്ങള് കര്ശനമായി പാലിക്കണം. ജില്ലാതലങ്ങളില് പരിപാടിയുടെ ഏകോപനവും മേല്നോട്ടവും ജില്ലാ കളക്ടര് നിര്വഹിക്കും. സ്ഥാപന മേധാവികള് തങ്ങളുടെ ഓഫീസിലുള്ള ജീവനക്കാരുടെ പങ്കാളിത്തം ഉറപ്പാക്കണമെന്നും നിര്ദേശമുണ്ട്.
