റാന്നി: സമഗ്ര ശിക്ഷ കേരളം സ്റ്റാർസ് 2024-25 പദ്ധതിയുടെ ഭാഗമായി പ്രീ-പ്രൈമറി, 1,2 ക്ലാസുകളെ കുട്ടികളുടെ ശാരീരിക മാനസിക വികാസനത്തിനു വേണ്ടി ആവിഷ്കരിച്ച കളിയങ്കണം (കിഡ്സ് അത് ലറ്റിക്സ്) പദ്ധതിയുടെ പ്രാരംഭ പ്രവർത്തനങ്ങൾക്ക് റാന്നിയിൽ തുടക്കമായി. സ്പോർട്സ് കേരള ഫൗണ്ടേഷനുമായി സഹകരിച്ചാണ് പദ്ധതി നടപ്പാക്കുന്നത്. ബി.പിസി ഷാജി എ സലാം പരിപാടി ഉദ്ഘാടനം ചെയ്തു. ഹെഡ്മാസ്റ്റേഴ്സ് ഫോറം കൺവീനർ സുരേഷ് വർക്കി അധ്യക്ഷത വഹിച്ചു. സി.പി. സുനിൽ, എസ്. ദീപ്തി, എൻ.എസ്. അനിത, അനൂഷ ശശി എന്നിവർ സംസാരിച്ചു.
വിവിധ പഞ്ചായത്തുകളിലെ ക്ലസ്റ്റർ റിസോഴ്സ് സെൻറർ (സി.ആർ.സി) ചുമതലയുള്ള പ്രഥമാധ്യാപകരായ പി.എസ് സിനിമോൾ (വെച്ചൂച്ചിറ ), ജയശ്രീ ദേവി (അങ്ങാടി), സി.പി സുനിൽ (റാന്നി), ഷിബി സൈമൺ (പഴവങ്ങാടി) റോയ് ജോൺ (നാറാണംമൂഴി ) എന്നിവർ തങ്ങളുടെ പഞ്ചായത്തിലെ വിദ്യാലയങ്ങൾക്കുള്ള ഉപകരണങ്ങളടങ്ങിയ കിറ്റ് വിതരണം ചെയ്തു. പരിപാടിയിൽ വിവിധ വിദ്യാലയങ്ങളിലെ പ്രഥമാധ്യാപകർ പങ്കെടുത്തു. ഹർഡിൽ, ഫ്ലാറ്റ് റിങ്ങ്, ബീൻ ബാഗ്, സോക്സർ കോൺ, തുടങ്ങിയ 8 ഇനങ്ങൾ അടങ്ങിയ കിറ്റാണ് വിതരണം ചെയ്തത്. ഉപകരണങ്ങൾ കൈകാര്യം ചെയ്യാൻ അധ്യാപകർക്ക് പ്രത്യേക പരിശീലനം നൽകും.
