അടൂര് : കാട്ടുപന്നിയുടെ ആക്രമണത്തില് ബൈക്ക് യാത്രക്കാരന് പരിക്കേറ്റു. അടൂര് നെടുംകുന്ന് ചക്കിമുക്ക് ബിനു ഭവനത്തില് ബിനുവിനാണ് പരിക്കേറ്റത്. കഴിഞ്ഞ രാത്രിയായിരുന്നു സംഭവം. ചക്കിമുക്കില് നിന്നും അന്തിച്ചിറയിലേക്ക് പോകുന്ന വഴി നെടുംകുന്ന് മലനട വഞ്ചിമുക്ക് ഭാഗത്ത് വെച്ച് ഇയാള് സഞ്ചരിച്ച ബൈക്കില് കാട്ടുപന്നി ഇടിക്കുകയായിരുന്നു. കാട്ടുപന്നിയുടെ ഇടിയുടെ ശക്തിയില് ബൈക്ക് പതിനഞ്ച് മീറ്ററോളം ദൂരത്തില് തെറിച്ച് പോവുകയും ചെയ്തു. അപകടത്തില് പരിക്കേറ്റ ബിനുവിനെ ആശുപത്രിയില് പ്രവേശിപ്പിച്ചു.
പ്രദേശത്ത് കഴിഞ്ഞ കുറച്ച് കാലങ്ങളായി കാട്ടുപന്നിയുടെ ശല്യം വലിയ രീതിയില് വര്ദ്ധിച്ചിട്ടുണ്ട്. രാത്രി സമയങ്ങളില് റോഡില് കൂട്ടമായി ഇറങ്ങുന്ന പന്നികള് വാഹനയാത്രക്കാര്ക്ക് വലിയ ഭീഷണിയാണ് ഉയര്ത്തുന്നത്. പ്രദേശത്തെ പലയിടങ്ങളും വ്യാപകമായ കൃഷി നാശം വരുത്തിയാണ് പന്നികള് മടങ്ങുന്നത്. ഈ ഭാഗത്ത് കാടുകയറി കിടക്കുന്ന സ്വകാര്യ വ്യക്തികളുടെ പറമ്പുകള് കാട്ടുപന്നികളുടെ താവളമായിമാറുന്നു എന്നും പ്രദേശവാസികള് പറയുന്നു.
