അടൂര് : ആനന്ദപ്പള്ളി ഗവണ്മെന്റ് എല്.പി സ്കൂള് പരിസരത്തെ മരങ്ങള് അപകട ഭീഷണിയുയര്ത്തുന്നു. കൊച്ചു കുട്ടികള് പഠിക്കുന്ന സ്കൂള് വളപ്പില് നിരവധി തണല് മരങ്ങളുണ്ട്. എന്നാല് മഴയും കാറ്റും വരുമ്പോള് ഈ മരങ്ങളുടെ ശിഖരങ്ങള് ഒടിഞ്ഞ് വീഴുന്നതും മരങ്ങള് കാറ്റില് ആടിയുലയുന്നതുമാണ് അപകട ഭീഷണിയാകുന്നത്. സ്കൂള് തുറന്നതോടെ കുട്ടികള് ഇതിന് ചുവട്ടിലാണ് കളിക്കുന്നത്. മരങ്ങളുടെ ഉണങ്ങിയ ചില്ലകള് ഒടിഞ്ഞ് വീഴുന്നതിന് സാധ്യത ഏറെയാണ്. 11 കെ.വി വൈദ്യുതി ലൈനും ഇതിനോട് ചേര്ന്ന് കടന്നുപോകുന്നുണ്ട്. കാറ്റത്ത് മരങ്ങള് ആടിയുലയുന്നത് ഭീതിയോടെയാണ് രക്ഷിതാക്കളും നാട്ടുകാരും കാണുന്നത്.
വേഗം ഒടിയുന്ന മരങ്ങളാണ് ഇവയെന്നും കൊച്ചുകുട്ടികള് വലിയ സുരക്ഷാ ഭീഷണിയിലാണ് സ്കൂളില് പഠിക്കാന് എത്തുന്നതെന്നും നാട്ടുകാര് പറയുന്നു. മരം ഒടിഞ്ഞുവീണാല് സ്കൂളിനും നാശം സംഭവിക്കാം. കാറ്റില് മരങ്ങള് ആടിയുലയാതിരിക്കാന് ശിഖരങ്ങള് മുറിക്കുന്നതിന് പോലും ആധികാരികള് നടപടി സ്വീകരിച്ചിട്ടില്ല. സ്കൂള് വളപ്പിലെ മരങ്ങള് കൊച്ചുകുട്ടികളുടെ ജീവന് തന്നെ ഭീഷണിയായ സാഹചര്യത്തിലാണ് അധികാരികളുടെ ഈ നിസംഗത.
