കൊച്ചി: സ്വകാര്യ ആശുപത്രിയില് ചികിത്സയില് തുടരുന്ന നടന് ഇന്നസെന്റിന്റെ നില അതീവ ഗുരുതരമായി തുടരുകയാണ്. പ്രചരിക്കുന്ന മറ്റ് വാര്ത്തകള് തെറ്റാണെന്നും ലേക്ക്ഷോര് ആശുപത്രി അധികൃതര് അറിയിച്ചു. ഇസിഎംഒ സഹായത്തിലാണ് ഇന്നസെന്റ് ഇപ്പോഴുള്ളതെന്നും ആശുപത്രി അധികൃതര് വ്യക്തമാക്കി. അര്ബുദരോഗ സംബന്ധിയായ പ്രശ്നങ്ങള് സങ്കീര്ണമായതോടെ രണ്ടാഴ്ച മുന്പ് അദ്ദേഹത്തെ ആശുപത്രിയില് പ്രവേശിപ്പിച്ചിരുന്നു. ഐ.സി.യുവില് നിന്നും മുറിയിലേക്ക് മാറ്റിയെങ്കിലും വീണ്ടും വെനിറ്റിലേറ്റര് സഹായം വേണ്ടിവന്നിരുന്നു.
അര്ബുദത്തെ തുടര്ന്നുണ്ടായ ചില ശാരീരിക അസ്വസ്ഥതകള് മൂലമാണ് അദ്ദേഹത്തെ ആശുപത്രിയില് പ്രവേശിപ്പിച്ചത്. കാന്സറിന് നേരത്തെയും ചികിത്സ തേടിയിട്ടുള്ള ഇന്നസെന്റ്, രോഗത്തെ അതിജീവിച്ച് ശക്തമായ തിരിച്ചുവരവ് നടത്തിയ വ്യക്തിയാണ്. കാന്സര് രോഗത്തെ തന്റെ ഇച്ഛാശക്തിയോടെ നേരിട്ട വ്യക്തിയായിട്ടാണ് നടന് ഇന്നസെന്റ് അറിയപ്പെടുന്നത്. കാന്സര് വാര്ഡിലെ ചിരി എന്നത് ഉള്പ്പടേയുള്ള പുസ്തകങ്ങളും അദ്ദേഹം എഴുതിയിട്ടുണ്ട്.
