കോഴഞ്ചേരി : ജില്ലാ ആശുപത്രിയിലെ ടിബി സെന്റർ പ്രവർത്തിക്കുന്ന കെട്ടിടം അപകടാവസ്ഥയിലായതിനാൽ ഉടൻ പൊളിച്ച് നീക്കാനും നിലവിൽ പേ വാർഡ് പ്രവർത്തിക്കുന്ന കെട്ടിടത്തിന്റെ ശോച്യാവസ്ഥയ്ക്ക് പരിഹാരം കാണണമെന്നതടക്കമുള്ള വിഷയങ്ങളിൽ ഉചിത നടപടി സ്വീകരിക്കാൻ മുഖ്യമന്ത്രിയുടെ ഓഫീസ് ആരോഗ്യ വകുപ്പ് ഡയറക്ടർക്ക് നിർദേശം നൽകി. ഹൈക്കോടതി അഭിഭാഷകനും പൊതുപ്രവർത്തകനുമായ അഡ്വ. കുളത്തൂർ ജയ്സിങ് നൽകിയ പരാതിയിലാണ് ഇടപെടൽ. ടിബി സെന്റർ പ്രവർത്തിക്കുന്ന കെട്ടിടം അപകടാവസ്ഥയിലായതിനാൽ ഇതിനോട് ചേർന്ന പേ വാർഡിലാണ് ഇപ്പോൾ ടിബി സെന്റർ പ്രവർത്തിക്കുന്നത്.
ഇത് ഡോക്ടർമാർക്കും രോഗികൾക്കും ബുദ്ധിമുട്ട് ഉണ്ടാക്കുന്നു. ഇടിഞ്ഞ് തുടങ്ങിയ പേ വാർഡിലാണ് ടിബി സെന്റർ പ്രവർത്തിക്കുന്നത്. രാവിലെ പത്തുമുതൽ രണ്ട് മണിവരെയാണ് ടിബി സെന്റർ പ്രവർത്തിക്കുന്നത്. രാവിലെ ഒൻപതുമുതൽ ടിബി സെന്റർ പ്രവർത്തിക്കാൻ നടപടി വേണമെന്നും അഡ്വ. കുളത്തൂർ ജയ്സിങ്ങിന്റെ പരാതിയിൽ ആവശ്യപ്പെട്ടിട്ടുണ്ട്. ജില്ലാ ആശുപത്രി പുതുക്കിപ്പണി നടക്കുന്നുണ്ടെങ്കിലും ടിബി സെന്ററിന്റെ കാര്യത്തിൽ ആരോഗ്യവകുപ്പ് നടപടി ഒന്നും സ്വീകരിക്കാതിരുന്നതിനെ തുടർന്നാണ് ജയ്സിങ് മുഖ്യമന്ത്രിയുടെ ഓഫീസിൽ പരാതി നൽകിയത്.
