കൊച്ചി : എഡിഎം നവീൻ ബാബുവിന്റെ പോസ്റ്റ് മോർട്ടം നടപടികളിൽ വീഴ്ചയുണ്ടെന്ന പരാതിയിൽ അന്വേഷണം പൂർത്തിയായി. ഹൈക്കോടതി അഭിഭാഷകനും പൊതുപ്രവർത്തകനുമായ അഡ്വ. കുളത്തൂർ ജയ്സിങ് ആണ് ഇത് സംബന്ധിച്ച പരാതി ചീഫ് സെക്രട്ടറിക്ക് നൽകിയിരുന്നത്. പോസ്റ്റ് മോർട്ടം ചെയ്ത ഡോക്ടർക്കെതിരെയും നടപടികൾ കൈകാര്യം ചെയ്ത കണ്ണൂർ ടൗൺ പോലീസ് സ്റ്റേഷൻ ഇൻസ്പെക്ടർക്കുമെതിരെയാണ് പരാതി നൽകിയത്. പരാതി അന്വേഷിക്കുവാൻ സർക്കാർ കണ്ണൂർ സിറ്റി പോലീസ് കമ്മീഷണറെ ചുമതലപ്പെടുത്തിയിരുന്നു.
പരാതിയിൽ പറയുന്ന കാര്യങ്ങൾ അന്വേഷിച്ചതായും ഡോക്ടറുടെ ഭാഗത്ത് നിന്നോ കണ്ണൂർ ടൗൺ പോലീസ് സ്റ്റേഷൻ ഇൻസ്പെക്ടറുടെ ഭാഗത്ത് നിന്നോ ഇത് സംബന്ധിച്ച് ചട്ട ലംഘനമോ നിയമ ലംഘനമോ ഉണ്ടായിട്ടില്ലെന്നാണ് അന്വേഷണം പൂർത്തിയാക്കി പരാതിക്കാരന് നൽകിയ മറുപടിയിൽ കണ്ണൂർ അഡി.പോലീസ് കമ്മീഷണർ വ്യക്തമാക്കുന്നത്. നവീൻ ബാബുവിന്റെ മരണത്തിൽ ഹൈക്കോടതിയുടെ മാനദണ്ഡങ്ങൾ പാലിച്ച് കേസിന്റെ അന്വേഷണം തുടർന്ന് വരികയാണെന്നും അഡ്വ.കുളത്തൂർ ജയ്സിങിന് നൽകിയ കത്തിൽ കമ്മീഷണർ വ്യക്തമാക്കുന്നു.
