ചെന്നൈ: ഐപിഎല്ലിൽ ഇന്ന് രണ്ട് മത്സരങ്ങള്. ആദ്യ മത്സരത്തിൽ റോയൽ ചലഞ്ചേഴ്സ് ബാംഗ്ലൂർ കൊൽക്കത്ത നൈറ്റ് റൈഡേഴ്സിനെ നേരിടും. വൈകിട്ട് മൂന്നരയ്ക്ക് ചെന്നൈയിലാണ് മത്സരം. ആദ്യ രണ്ട് മത്സരങ്ങളും ജയിച്ചാണ് ബാംഗ്ലൂരിന്റെ വരവ്. അതേസമയം മുംബൈക്കെതിരായ ഞെട്ടിക്കുന്ന തോൽവിയിൽ നിന്ന് മടങ്ങി വരാനാവും കൊൽക്കത്തയുടെ ശ്രമം. നേർക്കുനേർ കണക്കുകളിൽ ബാംഗ്ലൂർ 12ഉം കൊൽക്കത്ത 14ഉം മത്സരങ്ങളാണ് ജയിച്ചതാണ്.
രണ്ടാം മത്സരത്തിൽ ഡൽഹി ക്യാപിറ്റൽസ്, പഞ്ചാബ് കിംഗ്സിനെ നേരിടും. മുംബൈയിൽ വൈകിട്ട് 7.30നാണ് മത്സരം. ചെന്നൈക്കെതിരായ ദയനീയ തോൽവിക്ക് ശേഷമാണ് പഞ്ചാബ് ഇറങ്ങുന്നത്. രാജസ്ഥാനെതിരെ പൊരുതി തോറ്റാണ് ഡൽഹിയുടെ വരവ്.
ഐപിഎല്ലിൽ ഇന്നലെ നടന്ന മത്സരത്തില് സണ്റൈസേഴ്സ് ഹൈദരാബാദിനെതിരെ മുംബൈ ഇന്ത്യൻസ് മിന്നും ജയം സ്വന്തമാക്കി. അവസാന ഓവറുകളിൽ ഹൈദരാബാദ് ബാറ്റ്സ്മാൻമാരെ വരിഞ്ഞുമുറുക്കിയ മുംബൈ 13 റൺസ് ജയമാണ് സ്വന്തമാക്കിയത്. ജയത്തോടെ മുംബൈ പോയിന്റ് പട്ടികയിൽ ഒന്നാമതായി. അവസാന സ്ഥാനക്കാരാണ് ഹൈദരാബാദ്.