തിരുവനന്തപുരം : വില്പ്പന നടത്തുക ലക്ഷ്യമിട്ട് അനധികൃതമായി ഇരുതലമൂരി പാമ്പിനെ വളര്ത്തിയതില് ഒരാള് അറസ്റ്റില്. തെന്നൂര് കൊച്ചുകരിക്കകം പാലത്തിനുസമീപം ഷഫീര്ഖാന് (33) ആണ് അറസ്റ്റിലായത്. വന്യജീവി സംരക്ഷണ നിയമത്തിലുള്പ്പെട്ട ഇരുതലമൂരി പാമ്പിനെ കൈവശംവയ്ക്കുന്നതും വില്പ്പന നടത്തുന്നതും ശിക്ഷാര്ഹമാണ്. ഷഫീര്ഖാനെ കൂടാതെ മറ്റ് മൂന്ന് പേര്ക്ക് എതിരേയും പാലോട് റെയ്ഞ്ച് ഓഫീസര് കേസെടുത്തു. ഫോറസ്റ്റ് ഇന്റലിജന്സ് സെല് റെയിഞ്ച് വിഭാഗത്തിന് ലഭിച്ച രഹസ്യവിവരത്തെ തുടര്ന്ന് നടത്തിയ പരിശോധനയിലാണ് കമ്പോസ്റ്റ് ടാങ്കില് പാമ്പിനെ കണ്ടെത്തിയത്.
വീടിനു സമീപമുള്ള കമ്പോസ്റ്റ് ടാങ്കിലാണ് പാമ്പിനെ വളര്ത്തിയിരുന്നത്. ഈ സംഘത്തിലുള്പ്പെട്ട കൊച്ചുകരിക്കകം ടി.പി.ഹൗസില് ഷാംജീര് (32), തെന്നൂര് അന്സിയ മന്സിലില് അന്സില് (31), തെന്നൂര് സൂര്യകാന്തി തടത്തരികത്തുവീട്ടില് ഷാന് (31) എന്നിവര് ചേര്ന്നാണ് കടയ്ക്കലില്നിന്നു പാമ്പിനെ വിലയ്ക്ക് വാങ്ങിയത്.
