ജമ്മു : ദിവസങ്ങള്ക്കിടെ കശ്മീരില് വീണ്ടും ഡ്രോണ്. ജമ്മു കശ്മീരിലെ കനചക്കില് വെള്ളിയാഴ്ച കണ്ടെത്തിയ ഡ്രോണിനെ വെടിവച്ചിട്ടു. ഡ്രോണില്നിന്ന് സ്ഫോടക വസ്തുക്കളും ലഭിച്ചു. കൂടുതല് വിവരങ്ങള് പുറത്തുവരുന്നതേയുള്ളൂവെന്നു ജമ്മു കശ്മീര് പോലീസ് അറിയിച്ചു.
ബുധനാഴ്ച കശ്മീരിലെ സത്വാരി മേഖലയിലും അജ്ഞാത ഡ്രോണ് കണ്ടെത്തിയിരുന്നു. ജൂലൈ 16ന് ജമ്മു എയര് ബേസിനെ ഡ്രോണ് ഉപയോഗിച്ച് ആക്രമിക്കാനും ശ്രമമുണ്ടായി. ഈ സംഭവത്തിനു ശേഷം കശ്മീരില് എന്.എസ്.ജിയുടെ നേതൃത്വത്തില് ആന്റി – ഡ്രോണ് സിസ്റ്റം വിന്യസിച്ചിരുന്നു.
ജമ്മുവിലേതിനു സമാനമായി രാജ്യത്തെ മറ്റ് പ്രധാന എയര് ബേസുകളില് ആക്രമണമുണ്ടാകാതിരിക്കാന് വ്യോമസേനയും മുന്കരുതലെടുത്തു. ജമ്മു എയര് ബേസ് സംഭവത്തിനുശേഷം കശ്മീരില് ഡ്രോണുകള് കണ്ടെത്തുന്നതു വര്ധിച്ചിട്ടുണ്ട്. ബി.എസ്.എഫും സൈന്യവും ഡ്രോണുകള് വെടിവച്ചിടാറാണു പതിവ്.