മുട്ടം: ജനകീയ ഹോട്ടലുകള്ക്ക് സംസ്ഥാന സര്ക്കാര് നല്കിവന്ന സബ്സിഡി നിര്ത്തലാക്കി. അധിക സാമ്പത്തിക ബാധ്യതയും സാമ്പത്തിക ഞെരുക്കവുമാണ് സബ്സിഡി നിര്ത്തലാക്കിയതിന് പിന്നില്. ആഗസ്റ്റ് ഒന്നുമുതല് മുന്കാല പ്രാബല്യത്തോടെയാണ് ഉത്തരവ് ഇറക്കിയത്. വ്യക്തമായ മാനദണ്ഡങ്ങളില്ലാതെ സബ്സിഡി തുടര്ന്നുകൊണ്ടു പോകുന്നതില് പ്രായോഗിക ബുദ്ധിമുട്ടുണ്ടെന്ന് ധനവകുപ്പ് പ്രതിനിധികള് ജൂണില്തന്നെ പ്രഖ്യാപിച്ചിരുന്നു. ജനകീയ ഹോട്ടലുകള് കോവിഡിന്റെ പ്രത്യേക സാഹചര്യത്തില് തുടങ്ങിയവയാണെന്നും നിലവില് കോവിഡ് ഭീഷണിയില്ലാതായതിനാല് സബ്സിഡി തുടരാനാകില്ലെന്നുമാണ് ആഗസ്റ്റ് 10ന് തദ്ദേശ സ്വയംഭരണ വകുപ്പ് ഇറക്കിയ ഉത്തരവില് പറയുന്നത്.
ഓരോ ജില്ലയിലും ജനകീയ ഹോട്ടലുകളില്നിന്ന് വിതരണം ചെയ്യുന്ന ഉച്ചയൂണിന്റെ നിരക്ക് സംബന്ധിച്ച് അതത് ജില്ല പ്ലാനിങ് കമ്മിറ്റി നേതൃത്വത്തില് കുടുംബശ്രീ ജില്ല മിഷനുമായി ചര്ച്ച നടത്തുകയും നിശ്ചിതവില തീരുമാനിക്കുകയും ചെയ്യാം. ഉച്ചയൂണിന്റെ നിരക്ക് കുറഞ്ഞത് 30 രൂപ എന്ന നിലയിലും പാര്സല് ഊണുകള്ക്ക് 35 രൂപ എന്ന നിലയിലും നിശ്ചയിക്കാം. ഊണിന് ചോറ്, തോരന്, അച്ചാര്, നാടന് വിഭവം ഉള്പ്പെടെ മൂന്ന് തൊടുകറിയും ഒരു ഒഴിച്ചുകറിയും (സാമ്പാര്, രസം, മോരുകറി, പരിപ്പ് എന്നിവയില് ഒന്ന്) മീന്കറിയും നിര്ബന്ധമായി ഉണ്ടായിരിക്കണം. കൂടുതല് വിഭവങ്ങള്, നോണ് വെജ് വിഭവങ്ങള്, സ്പെഷല് വിഭവങ്ങള് എന്നിവ ആവശ്യാനുസരണം തയാറാക്കാവുന്നതും അതത് ഹോട്ടല് സംരംഭകര് നിശ്ചയിക്കുന്ന നിരക്ക് ഈടാക്കാവുന്നതുമാണെന്ന് ഉത്തരവില് പറയുന്നു.
