പട്ടാമ്പി : ജനം നിധി നിക്ഷേപ തട്ടിപ്പില്‍ പട്ടാമ്ബിയില്‍നിന്ന് പിരിച്ചെടുത്തത് രണ്ടര കോടി രൂപ. തട്ടിപ്പിനിരയായവര്‍ ആക്ഷന്‍ കമ്മിറ്റി രൂപവത്കരിച്ചു. ഉടമ മനോഹരനെ അറസ്റ്റ് ചെയ്യണമെന്നും സ്വത്തുക്കള്‍ കണ്ടുകെട്ടണമെന്നുമാണ് ആവശ്യം. നാലു വര്‍ഷമായി പട്ടാമ്പിയില്‍ പ്രവര്‍ത്തിക്കുന്ന ജനം നിധി ലിമിറ്റഡ് എന്ന സ്വകാര്യ പണമിടപാട് സ്ഥാപനമാണ് കഴിഞ്ഞ ദിവസം അടച്ചുപൂട്ടി ഉടമ കോടികളുമായി മുങ്ങിയത്.
വീട്ടമ്മമാരെയും തൊഴില്‍രഹിതരായ യുവാക്കളെയും കളക്ഷന്‍ ഏജന്‍റുമാരാക്കിയാണ് കോടികളുടെ നിക്ഷേപമുണ്ടാക്കിയത്. പാലക്കാട്, ഗുരുവായൂര്‍, തൃശൂര്‍ എന്നിവിടങ്ങളിലുള്ള ശാഖകളിലും സമാനമായ തട്ടിപ്പ് നടന്നിട്ടുണ്ട്. പട്ടാമ്പി ശാഖയില്‍ മാത്രം നൂറിലേറെ റക്കറിങ് ഇടപാടുകാരുടെ 60 ലക്ഷം രൂപയും 35 സ്ഥിരം നിക്ഷേപകരുടെ ഒരു കോടി 70 ലക്ഷം രൂപയുമടക്കം രണ്ടര കോടിയോളം രൂപ നഷ്ടപ്പെട്ടെന്നും ആക്ഷന്‍ കമ്മിറ്റി ഭാരവാഹികള്‍ പറഞ്ഞു.
ഇടപാടുകാരെ വഞ്ചിച്ച്‌ കോടികളുമായി മുങ്ങിയ ജനംനിധി ഉടമ തൃശൂര്‍ സ്വദേശിയായ മനോഹരനെ അറസ്റ്റ് ചെയ്ത് സ്വത്തുവഹകള്‍ കണ്ടു കെട്ടണമെന്നും നഷ്ടപ്പെട്ട തുക തിരിച്ചുപിടിക്കാന്‍ പ്രത്യേക ഏജന്‍സിയെ നിയോഗിക്കണമെന്നും ആക്ഷന്‍ കമ്മിറ്റി ഭാരവാഹികള്‍ ആവശ്യപ്പെട്ടു. പരാതിയെ തുടര്‍ന്ന് പട്ടാമ്പി പോലീസ് കഴിഞ്ഞ ദിവസം സ്ഥാപനത്തിെന്‍റ ഓഫിസില്‍ പരിശോധിച്ച്‌ രേഖകള്‍ പിടിച്ചെടുത്തിരുന്നു.
സാധാരണക്കാരും വീട്ടമ്മമാരും ഉള്‍പ്പെടെ നൂറുകണക്കിനാളുകളാണ് റക്കറിങ്, സ്ഥിര നിക്ഷേപങ്ങളില്‍ ഇടപാട് നടത്തി തുക നഷ്ടപ്പെട്ടത്. ഇവരുടെ ആവലാതികള്‍ക്ക് പരിഹാരം കാണാന്‍ പോലീസ് അന്വേഷണം ഊര്‍ജിതമാക്കണമെന്നും ജനം നിധി ലിമിറ്റഡിെന്‍റ എല്ലാ കേസുകളും ഏജന്‍സി അന്വേഷിക്കണമെന്നും ആക്ഷന്‍ കമ്മിറ്റി ഭാരവാഹികളായ എ.ആര്‍ രാജേഷ്, ടി.വി അശോകന്‍, കെ. സനൂപ്, എം.സൂരജ്, റിജോയ് സി ജോര്‍ജ് എന്നിവര്‍ ആവശ്യപ്പെട്ടു
