റാഞ്ചി: ഝാര്ഖണ്ഡ് ന്യൂനപക്ഷ ക്ഷേമ മന്ത്രി ഹാജി ഹുസയ്ന് അന്സാരി (73) അന്തരിച്ചു. കൊറോണവൈറസില് നിന്ന് രോഗമുക്തി നേടിയതിന്റെ പിറ്റേന്ന് ഹൃദയാഘാതത്തെ തുടര്ന്നായിരുന്നു അന്ത്യം.
സെപ്തംബര് 26നാണ് കൊവിഡ് സ്ഥിരീകരിച്ച അന്സാരിയെ ചികിത്സക്കായി റാഞ്ചി മേദാന്ത ആശുപത്രിയില് പ്രവേശിപ്പിച്ചത്. ഇന്നലെ നടത്തിയ കൊവിഡ് പരിശോധനയില് ഫലം നെഗറ്റീവായിരുന്നെന്ന് ബന്ധുക്കള് പറഞ്ഞു.
1947ല് ദിയോഗര് ജില്ലയിലെ പിപ്ര ഗ്രാമത്തില് ജനിച്ച അന്സാരി 1995ലാണ് ആദ്യമായി നിയമസഭ സാമാജികനായത്. 2000, 2009, 2019 എന്നീ വര്ഷങ്ങളില് വീണ്ടും നിയമസഭയിലെത്തി.
അന്സാരിയുടെ നിര്യാണത്തില് മുഖ്യമന്ത്രി ഹേമന്ദ് സോറന് അനുശോചനം രേഖപ്പെടുത്തി. സംസ്ഥാന രൂപികരണത്തില് സുപ്രധാന പങ്ക് വഹിച്ച നേതാവായിരുന്നു അദ്ദേഹമെന്ന് സോറന് പറഞ്ഞു.
