ബംഗളൂരു: കന്നഡ സൂപ്പര്സ്റ്റാര് കിച്ച സുദീപ് ഭാഗമായ സിനിമകളും ടെലിവിഷന് പരിപാടികളും സംപ്രേഷണം ചെയ്യുന്നത് വിലക്കണമെന്ന് ആവശ്യപ്പെട്ട് ജെ.ഡി.എസ് തെരഞ്ഞെടുപ്പ് കമ്മിഷന് കത്തയച്ചു. കര്ണാടക നിയമസഭാ തെരഞ്ഞെടുപ്പ് തൊട്ടരികെനില്ക്കെ ബി.ജെ.പിക്ക് നടന് പിന്തുണ പ്രഖ്യാപിച്ചിരുന്നു. ഇതിന് പിന്നാലെയാണ് സുദീപിന്റെ സിനിമകള് നിരോധിക്കണമെന്നാവശ്യവുമായി ജെ.ഡി.എസ് രംഗത്തെത്തിയിരിക്കുന്നത്. തെരഞ്ഞെടുപ്പില് വോട്ടര്മാരെ സ്വാധീനിക്കാനിടയുണ്ടെന്ന് ചൂണ്ടിക്കാട്ടിയാണ് ആവശ്യം.
നടന്റെ സിനിമകളും ടെലിവിഷന് പരിപാടികളും സംപ്രേഷണം ചെയ്യുന്നത് വിലക്കണമെന്ന് ആവശ്യപ്പെട്ട് ഒരു അഭിഭാഷകനും രംഗത്തെത്തിയിട്ടുണ്ട്. ശിവമോഗ സ്വദേശിയായ അഡ്വ. കെ.പി ശ്രീപാല് ആണ് കിച്ച സുദീപിന്റെ ചിത്രങ്ങളും ഷോകളും നിരോധിക്കണമെന്ന് ആവശ്യപ്പെട്ട് തെരഞ്ഞെടുപ്പ് കമ്മിഷന് കത്തയച്ചത്. തെരഞ്ഞെടുപ്പ് ഫലം പ്രഖ്യാപിക്കുന്നതുവരെ വിലക്കേര്പ്പെടുത്താനാണ് ആവശ്യം. നിയമസഭാ തെരഞ്ഞെടുപ്പില് ബി.ജെ.പിക്കു വേണ്ടി പ്രചാരണത്തിനിറങ്ങുമെന്ന് ബുധനാഴ്ച കിച്ച പ്രഖ്യാപിച്ചിരുന്നു.
