തിരുവനന്തപുരം: കേരളം രാജ്യത്തെ മറ്റ് സംസ്ഥാനങ്ങള്ക്ക് മാതൃകയാണെന്ന് ജാര്ഖണ്ഡ് കൃഷി വകുപ്പ് മന്ത്രി ബാദല് പത്രലേഖ്. കനകക്കുന്നില് നടക്കുന്ന ‘എന്റെ കേരളം’ മെഗാ പ്രദര്ശന വിപണന മേള സന്ദര്ശിച്ച ശേഷം പ്രതികരിക്കുകയായിരുന്നു മന്ത്രി. കേരളത്തിലെ കാര്ഷിക – മൃഗസംരക്ഷണ രംഗത്തെ നേട്ടങ്ങള് പഠിക്കാനെത്തിയതാണ് മന്ത്രിയും സംഘവും. മൂന്ന് ദിവസത്തെ ഔദ്യോഗിക സന്ദര്ശനത്തിനായാണ് മന്ത്രിയും സംഘവും തലസ്ഥാനത്തെത്തിയത്.
മലയാളിയായ ഐ.എ.എസ് ഉദ്യോഗസ്ഥനും ജാര്ഖണ്ഡിലെ കൃഷി വകുപ്പ് സെക്രട്ടറിയുമായ പി. അബൂബക്കര് സിദ്ദീഖ് പല കാര്യങ്ങളിലും കേരള മാതൃക പിന്തുടരണമെന്ന് എനിക്ക് ഉപദേശം തരാറുണ്ട്. അദ്ദേഹത്തില് നിന്നും മാധ്യമങ്ങളിലൂടെയും കേരളത്തെക്കുറിച്ച് കേട്ട നല്ല വാര്ത്തകളെല്ലാം ശരിയാണെന്ന് സന്ദര്ശനത്തിലൂടെ ബോധ്യപ്പെട്ടു. മികച്ച രീതിയിലാണ് കേരളത്തിലെ സര്ക്കാര് സംവിധാനങ്ങള് പ്രവര്ത്തിക്കുന്നത്. മലനിരകളും കായലുകളും പച്ചപ്പും നിറഞ്ഞ കേരളത്തിലെ ഭൂപ്രകൃതി മികച്ചതാണ്. എല്ലാവരും കേരളം സന്ദര്ശിക്കണം. കേരളവും കേരള വികസന മാതൃകയും കണ്ടില്ലെങ്കില് നിങ്ങള് പിന്നെയെന്താണ് ജീവിതത്തില് കണ്ടതെന്നും മന്ത്രി പറഞ്ഞു.
