മലപ്പുറം : വിദേശജോലി വാഗ്ദാനം ചെയ്ത് നിരവധി പേരില് നിന്ന് പണം തട്ടിയ പ്രതി പോലീസ് പിടിയില്. കടുങ്ങാത്തുകുണ്ട് അറഫ ട്രാവല്സ് ഉടമ ഒഴൂര് ഓമച്ചപ്പുഴ കാമ്പത്ത് നിസാറാണ് (34) പിടിയിലായത്. വിദേശരാജ്യങ്ങളില് നല്ല പിടിപാടുണ്ടെന്നും അതുവഴി നല്ല ശമ്പളമുള്ള ജോലി ശരിയാക്കിത്തരാമെന്നും വാഗ്ദാനം നല്കിയാണ് ഇയാള് തട്ടിപ്പ് നടത്തിയിരുന്നതെന്ന് പോലീസ് പറഞ്ഞു. ദിനില് എന്ന യുവാവ് കല്പ്പകഞ്ചേരി പോലീസ് സ്റ്റേഷനില് ഇയാള്ക്കെതിരെ കേസ് രജിസ്റ്റര് ചെയ്തതോടെയാണ് നിസാറിന്റെ കള്ളങ്ങള് പുറം ലോകമറിയുന്നത്.
ഷാര്ജയിലെ ഫുഡ് പാര്ക്കില് ജോലി ശരിയാക്കിത്തരാം എന്ന് പറഞ്ഞ് 50,000 രൂപയാണ് ഇയാളില്നിന്ന് നിസാര് വാങ്ങിയത്. പ്രതിക്കെതിരെ സമാനമായ 14 പരാതികളാണ് കല്പകഞ്ചേരി സ്റ്റേഷനില് ഇതുവരേയ്ക്കും ലഭിച്ചിട്ടുള്ളത്. പ്രശ്നം ഗുരുതരമായതോടെ ട്രാവല് അടച്ച് പൂട്ടി നാട്ടില് നിന്ന് മുങ്ങിയ നിസാറിനെ സൈബര് സെല്ലിന്റെ സഹായത്തോടെയാണ് പോലീസ് പിടികൂടിയത്. ഇയാള് തിരൂരങ്ങാടി കൊളപ്പുറത്ത് വാടക ക്വാര്ട്ടേഴ്സില് ഒളിവില് താമസിക്കുകയായിരുന്നു.