ആന്റണി വര്ഗീസിനെതിരെയുള്ള പരാമര്ശത്തില് ക്ഷമ പറഞ്ഞ് സംവിധായകന് ജൂഡ് ആന്തണി ജോസഫ്. പറഞ്ഞതില് കുറ്റബോധമുണ്ടെന്നും സത്യമാണോ എന്നു പോലും തനിക്കറിയാത്ത കാര്യമായിരുന്നു ആന്റണിയുടെ സഹോദരിയുടെ വിവാഹവുമായി ബന്ധപ്പെട്ട് പറഞ്ഞതെന്നും സംവിധായകന് പറഞ്ഞു. ഒരു അഭിമുഖത്തിലായിരുന്നു ജൂഡിന്റെ പ്രതികരണം. അങ്ങനെ പറയേണ്ടിയിരുന്നില്ല, പറഞ്ഞ ടോണും മാറിപ്പോയി. അദ്ദേഹത്തിന്റെ സഹോദരിക്കും കുടുംബത്തിനും ഒരുപാട് വിഷമം ഉണ്ടായിട്ടുണ്ടാകും. അതുകൊണ്ടുതന്നെ ഞാന് അവരോട് മാപ്പ് പറയുകയാണെന്ന് ജൂഡ് ആന്തണി പറഞ്ഞു.
അത് പറയാന് ഞാന് അവരെ വിളിച്ചിരുന്നു, എന്നാല് കിട്ടിയില്ല. ഞാന് ആ നിര്മ്മാതാവിന്റെ കാര്യമേ അപ്പോള് ആലോചിച്ചിരുന്നുള്ളു. അദ്ദേഹവും ഭാര്യയും മക്കളുമൊക്കെ കരയുന്നത് ഞാന് കണ്ടിട്ടുണ്ട്. അതോര്ത്തപ്പോള് പറഞ്ഞു പോയതാണ്. ഉള്ളിലില്ലാത്ത ദേഷ്യമാണ് പുറത്തുവന്നത്. അത് ഭയങ്കര ചീപ്പ് ആയിപ്പോയി. ജൂഡ് പറഞ്ഞു. അഭിനയിക്കാമെന്ന കരാറില് ആന്റണി തന്റെ കൈയ്യില് നിന്ന് പണം വാങ്ങി സഹോദരിയുടെ വിവാഹം നടത്തിയശേഷം സിനിമയില് നിന്ന് പിന്മാറിയെന്നായിരുന്നു ജൂഡിന്റെ ആരോപണം.
