തിരുവനന്തപുരം : നിയമസഭാ തെരഞ്ഞെടുപ്പ് ഫലങ്ങൾക്ക് പിന്നാലെ മുന്നണിയുടെ ഐക്യം ഊട്ടിയുറപ്പിക്കാൻ ‘ടീം യുഡിഎഫ്’ എന്ന സന്ദേശവുമായി മുതിർന്ന നേതാവ് കെ. മുരളീധരൻ. മുഖ്യമന്ത്രിയെ തീരുമാനിക്കുന്നത് പോലുള്ള സുപ്രധാന കാര്യങ്ങൾ വളരെ സുഗമമായി പൂർത്തിയാക്കണമെന്നും പാർട്ടിയും മുന്നണിയും ഒറ്റക്കെട്ടാണെന്ന ബോധ്യം ജനങ്ങളിൽ ഉണ്ടാക്കണമെന്നും അദ്ദേഹം ആവശ്യപ്പെട്ടു. ബിജെപിയുടെ മുന്നേറ്റത്തെയും ന്യൂനപക്ഷ വോട്ടുകളുടെ ധ്രുവീകരണത്തെയും കുറിച്ച് മുരളീധരൻ ഗൗരവകരമായ നിരീക്ഷണങ്ങളാണ് പങ്കുവെച്ചത്.
കേരളത്തിലെ ചില മേഖലകളിൽ ന്യൂനപക്ഷങ്ങൾ കോൺഗ്രസിനെ പൂർണ്ണമായ വിശ്വാസത്തിലെടുത്തിട്ടുണ്ടോ എന്ന് സംശയമുണ്ടെന്ന് അദ്ദേഹം പറഞ്ഞു. ഇതിന് ഉദാഹരണമായി അദ്ദേഹം ചൂണ്ടിക്കാട്ടിയത് നേമം മണ്ഡലമാണ്. കഴിഞ്ഞ തവണ നേമത്ത് തന്നെ വിജയിപ്പിച്ചിരുന്നെങ്കിൽ ആ മണ്ഡലം യുഡിഎഫ് നിലനിർത്തുമായിരുന്നുവെന്നും അന്ന് ന്യൂനപക്ഷ വോട്ടുകൾ എൻ ബ്ലോക്കായി എൽഡിഎഫ് സ്ഥാനാർത്ഥിക്ക് ലഭിച്ചതാണ് തിരിച്ചടിയായതെന്നും അദ്ദേഹം വ്യക്തമാക്കി.
