കോഴിക്കോട് : കെ-റെയില് നടപ്പാക്കും മുന്പ് മൂന്ന് കാര്യങ്ങള് ബോധ്യപ്പെടുത്തണമെന്ന് സി.പി.ഐ അസി. സെക്രട്ടറി പ്രകാശ് ബാബു. പദ്ധതി നടപ്പാക്കാം, പക്ഷെ അത് ജനങ്ങളെ ബോധ്യപ്പെടുത്തികൊണ്ട് വേണം, സാമൂഹിക ആഘാത പഠനറിപ്പോര്ട്ട് പുറത്തുവിടണം, കുടിയൊഴിപ്പിക്കപ്പെടുന്നവരുടെ പുനരധിവാസം ഉള്പ്പെടെയുളള ആശങ്ക ഒഴിവാക്കണം എന്നിവയാണ് പ്രധാനമായും സി.പി.ഐ മുന്നോട്ട് വെക്കുന്നത്. തൃക്കാക്കര ഉപതെരഞ്ഞെടുപ്പില് സര്ക്കാര് പ്രവര്ത്തനവും ജനങ്ങളെ വിലയിരുത്തിട്ടുണ്ടാവാമെന്ന് പ്രകാശ് ബാബു പറയുന്നു.
തൃക്കാക്കരയിലെ പരാജയത്തിനു പിന്നാലെ ജനവിധിയാണ് വലുതെന്ന പാഠമാണ് തൃക്കാക്കര ഉപതെരഞ്ഞെടുപ്പിലെ തോല്വി നല്കുന്നതെന്ന വിലയിരുത്തലുമായി സി.പി.ഐ നേതാവ് ബിനോയ് വിശ്വം രംഗത്തെത്തിയിരുന്നു. ജനങ്ങളെ വിശ്വാസത്തിലെടുത്തുള്ള വികസന നയം വേണം നടപ്പാക്കാന്. തൃക്കാക്കര ജനവിധി ഇടതുമുന്നണി ഒരുമിച്ചും പാര്ട്ടികള് വെവ്വേറെയും വിശകലനം ചെയ്യുമെന്നാണ് ബിനോയ് വിശ്വം പറഞ്ഞത്. ഇതോടെ, കെ-റെയില് വിഷയത്തില് സി.പി.ഐയില് അഭിപ്രായ ഭിന്നത നിലനില്ക്കുന്നതായാണ് വിലയിരുത്തല്. കെ-റെയിലില് കാനം രാജേന്ദ്രന് പൂര്ണ പിന്തുണയാണിതുവരെ സര്ക്കാറിനു നല്കിയത്. പുതിയ സാഹചര്യത്തില് കാനം രാജേന്ദ്രന്റെ അഭിപ്രായത്തിനു പ്രസക്തിയേറെയാണ്.
